આજથી બ્રિટનના સ્ટુડન્ટ વિઝા ફી અને વિઝિટર વિઝા ફીમાં વધારો લાગુ

બ્રિટનની યાત્રા કરવા તેમજ ત્યાં જઇને ભણવા ઇચ્છતા લોકો માટે અત્યંત મહત્વના સમાચાર છે. આજથી બ્રિટનની સરકાર દ્વારા 6 મહિનાથી ઓછી વિઝિટર વિઝાની યાત્રા માટેની ફીમાં 15 પાઉન્ડનો વધારો અને સ્ટુડન્ટ વિઝા ફીમાં 127 પાઉન્ડનો વધારો અમલી ગણાશે, આથી આ વધારા બાદની નવી ફી વિઝિટર વિઝા માટે 115 પાઉન્ડ અને સ્ટુડન્ટ વિઝા માટે 490 પાઉન્ડ થઇ જશે.

જો કે ટૂંકાગાળાના અભ્યાસક્રમો માટે વિઝા ફીમાં કોઇ વધારો થશે નહિ, જે વિદ્યાર્થીઓ 6 મહિનાથી વધુ પરંતુ 11 મહિનાથી ઓછા સમય માટે અભ્યાસ કરે છે તેમના માટે વિઝા ફીમાં વધારો થશે નહિ. વર્કર્સ માટે, જ્યાં 3 વર્ષ કે તેથી ઓછા સમય માટે સ્પોન્સરશિપનું પ્રમાણપત્ર આપવામાં આવ્યું હોય ત્યાં 625 પાઉન્ડથી વધીને 719 પાઉન્ડ થશે. તેમજ જો 3 વર્ષથી વધુ સમય માટે આપવામાં આવ્યું હોય તો ઇમિગ્રેશન ફી 1235 પાઉન્ડથી વધીને 1420 પાઉન્ડ થશે.

બ્રિટનની સંસદમાં ગયા મહિને જ ફી વધારા અંગેના કાયદાની રજૂઆત કરવામાં આવી હતી. ગત જુલાઇ મહિનામાં જ બ્રિટનના વડા પ્રધાન ઋષિ સુનકે જણાવ્યું હતું કે અમે આ દેશમાં આવનારા પ્રવાસીઓ માટેના વિઝા ફીમાં વધારો કરવા જઇ રહ્યાં છીએ. બ્રિટનના ગૃહ મંત્રાલયની ઓફિસના પ્રવક્તાના જણાવ્યા મુજબ દેશમાં મહત્વપૂર્ણ જાહેર સેવાઓ માટે વધુ ફંડ ફાળવી શકાય તે માટે આ વધારો અમલમાં મુકવામાં આવ્યો છે.