કેનેડા બાદ હવે ખાલિસ્તાની તત્વોએ અમેરિકામાં મંદિરોને નિશાન બનાવ્યા
કેલિફોર્નિયા: કેનેડા બાદ હવે અમેરિકામાં પણ ખાલિસ્તાની આતંકવાદીઓ અને તેમના સમર્થકોનું મનોબળ સતત વધી રહ્યું છે. જોકે બંને દેશોની સરકારો આ ખાલિસ્તાની તત્વો સામે કડક કાર્યવાહી કરી રહી નથી. તેમ છતાં ખાલિસ્તાની આતંકવાદીઓ ક્યારેક ભારતીય દૂતાવાસ અને હાઈ કમિશન તો ક્યારેક હિંદુ મંદિરોને નિશાન બનાવે છે. આવી જ એક ઘટના અમેરિકાના કેલિફોર્નિયામાં બની છે. આ વખતે ખાલિસ્તાની તત્વોએ કેલિફોર્નિયાના નેવાર્કમાં સ્વામિનારાયણ મંદિરની દીવાલ પર અભદ્ર ભાષામાં નારા લખ્યા હતા.
જેની માહિતી સોશિયલ મીડિયા દ્વારા હિન્દુ-અમેરિકન ફાઉન્ડેશને આપી હતી. જેમાં જણાવ્યું હતું કે ખાલિસ્તાની તત્વોએ નેવાર્કમાં સ્વામિનારાયણ મંદિર SMVS સંસ્થાની દિવાલો પર સૂત્રો લખ્યા હતા. આ નારાઓમાં જરનૈલ સિંહ ભિંડરાનવાલા માટે ઝિંદાબાદ અને પીએમ નરેન્દ્ર મોદીને આતંકવાદી ગણાવવામાં આવ્યા છે.
“હિંદુ-અમેરિકન ફાઉન્ડેશને સ્વામિનારાયણ મંદિરની દિવાલો પર લખવામાં આવેલા ખાલિસ્તાની સ્લોગન પર ચિંતા વ્યક્ત કરી છે. ફાઉન્ડેશને હેટ ક્રાઈમની કલમો હેઠળ આ મામલાની તપાસ કરવાની પણ માંગ કરી છે. હિંદુ-અમેરિકન ફાઉન્ડેશને નેવાર્ક પોલીસ તેમજ ત્યાંના નાગરિક અધિકાર અધિકારીઓને સ્વામિનારાયણ મંદિરની દિવાલો પર ખાલિસ્તાની સૂત્રો લખવા અંગે જાણ કરી છે. નોંધનીય છે કે અગાઉ કેનેડામાં પણ ખાલિસ્તાની તત્વોએ અનેકવાર અલગ-અલગ મંદિરોને નિશાન બનાવ્યા છે. આ મંદિરોની દિવાલો પર ખાલિસ્તાનીના નારા લખવામાં આવ્યા હતા. તાજેતરમાં કેનેડાના સરે શહેરમાં એક મંદિરમાં તોડફોડ કરવામાં આવી હતી અને આતંકવાદી હરદીપ સિંહ નિજ્જરના ફોટાવાળા જનમતના પોસ્ટરો પણ ચોંટાડવામાં આવ્યા હતા.
આ ઉપરાંત કેનેડા અને અમેરિકામાં ખાલિસ્તાની તત્વોએ ભારતીય દૂતાવાસ અને હાઈ કમિશનને પણ નિશાન બનાવ્યા હતા. અમેરિકામાં એફબીઆઈએ આ મામલે તપાસ શરૂ કરી છે, પરંતુ કેનેડામાં જસ્ટિન ટ્રુડોની સરકાર આ ખાલિસ્તાની તત્વો સામે કોઈ પગલાં લેતી નથી. જોકે અમેરિકામાં પણ ખાલિસ્તાની તત્વો સામે હજુ સુધી કોઈ કડક કાર્યવાહી કરવામાં આવી નથી. જેના કારણે ખાલિસ્તાની આતંકવાદીઓ અને તેમના સમર્થકોનું મનોબળ સતત વધી રહ્યું છે. ખાસ વાત એ છે કે ભારતે હંમેશા અમેરિકા અને કેનેડાને આવા તત્વોને કાબૂમાં લેવા વિનંતી કરી છે, પરંતુ તેમ છતાં બંને દેશો કોઈ નક્કર પગલાં લેતા જોવા મળતા નથી.
