રમુજી સવાલના મનમોજી જવાબ

દર્શન ભાવસાર

શેર બજારમાં તેજીના પ્રતીક માટે આખલો કેમ છે?

• રોકાણકાર આખલાની જેમ કૂદી પડે છે.. પછી ક્યારેક ગધેડાની જેમ પટકાય છે.
  અવનવી રીતે છેતરપિંડી કેમ થતી હશે?
  
• છેતરપિંડીમાં ય ટકી રહેવા માટે નવા આઈડિયા જરૂરી હોય છે.
  રાજ્ય કે દેશમાં માથાદીઠ દેવું વધે તો શું કરવાનું?
  
• તમારા હિસ્સાનું ચોખ્ખું ઘી પીવાનું..
  દરેક સંકલ્પ સાકાર થાય ખરાં?
  
• એ માટે પણ સંકલ્પ કરવા પડે.
  સૂત્રધાર શેની ધાર કાઢે?.
  
• શબ્દોની….વાણીની….અને લાગે આવે તો પ્રેક્ષકોની.
  ચોર પકડાય ત્યારે લોકો એને કેમ મારે છે?
  
• આપણે ત્યાં ચોર પૂજાનો રિવાજ નથી.
  ઉપર ગગન વિશાળ હોય ધરતી કેવી હોય?
  
• – ધરતી -લીલુડી ને રણ અફાટ.
  સ્માર્ટ ક્લાસ ને સ્માર્ટ સ્કૂલથી બાળકો સ્માર્ટ થશે?
  
• પહેલાં વાલીએ સ્માર્ટ થવું પડશે…
  સ્ત્રીની સુંદરતાના વખાણ પુરુષે જ કેમ કરવા પડે છે?
  
• આયનો મૌન વ્રતધારી હોય છે એટલે…
  ફિલ્મ, કળા, વેપાર અને રાજકારણની જેમ હવે ધર્મમાં પણ પરિવારવાદ હોય એ કેટલું યોગ્ય ?
  
• આને ઘેટાશાહી ધર્મ કહેવાય …
  ખટમીઠાંમાં ખારાશ અને મીઠાશનું પ્રમાણ કેટલું હશે?
  
• લગભગ સેવ મમરા જેટલું….
  રાજકારણમાં ઘણી અનીતિ થતી હોવા છતાંય રાજનીતિ કેમ કહેવાય છે?
  
• આ પણ એક કુટિલ નીતિ છે….
  દેવ-દેવીના પ્રાર્થના, ભજન, સ્તુતિ હોય તો ભક્ત માટે શું?
• ભગવાનના નામે હૂંડી ઈશ્યુ કરવાની પરવાનગી…
  
  ગુજરાતમાં હમણાંથી ગુનાખોરી કેમ વધી છે?.
• નેતા-પોલીસ ને જનતાને પૂછો….
  નીચું નિશાન હોય તો માફ કેમ નહીં કરવાનું?
  
• સજા ના કરવી પડે એટલે…
  આજકાલ માફી માંગવાનો ટ્રેન્ડ કેમ વધી ગયો છે?
  
• તમે માફી ન આપીને એમાં અપવાદ બની શકો…ખુશ?
  રાજા માટે રાજ એક્સપ્રેસ અને રાણી માટે ક્વિન એક્સપ્રેસ તો ગરીબ માટે શું?
  
• બસ, છકડો, રિક્ષા અને ગરીબ રથ એક્સપ્રેસ ટ્રેન…
  મારી ગર્લ ફ્રેન્ડને હું પૂજાના ફૂલ કહું છું….તો એની મમ્મીને શું કહું ?
  
• ઓફકોર્સ, પૂજારણ…
  ખમણમાં મણ છે.?
  
• એમ તો જમણમાં પણ મણ છે…
  સરકારી યોજનાના નામ રૂપાળા કેમ હોય છે?
  
• પ્રજાને ભોળવવા માટે…
  લાંચનો પણ વિકાસ થાય તો ?
  તો એ લાંચનો વિકાસપથ બની જાય (જાય શું? એ તો કયારનો બની ગયો !)
  છાપામાં મારો ફોટો કયારે આવશે?
  
• બેન્કમાં મોટી ધાડ પાડો પોલીસ સામેથી તમારા ફોટા છપાવશે…
  ભાગીને લગ્ન કર્યા પછી સાસરે જવાનો ચાન્સ મળે ખરો?
  
• કોના સાસરે તમારા કે તમારી પત્નીના?
  
  યુવતી સારો જીવનસાથી મેળવવા – પત્ની એના પતિના દીર્ઘાયુ માટે વ્રત કરે છે તો પતિ માટે કેમ કોઈ વ્રત નથી?
• એવા કોઈ વ્રતમાં ન પડો.. એ ફળશે તો પાછળથી ‘ફસાઈ ગયા’નો પસ્તાવો થશે