અમેરિકાના ભૂતપૂર્વ વિદેશ મંત્રી હેનરી કિસિંજરનું 100 વર્ષની વયે નિધન
1971ના ભારત-પાકિસ્તાન યુદ્ધ દરમિયાન વિવાદાસ્પદ રહી હતી ભૂમિકા
વોશિંગ્ટનઃ અમેરિકાના ભૂતપૂર્વ વિદેશપ્રધાન હેનરી કિસિંજરનું 100 વર્ષની વયે નિધન થયું છે. જણાવવામાં આવી રહ્યું છે કે બુધવારે કનેક્ટિકટ સ્થિત તેમના ઘરે તેમનું નિધન થયું હતું.
કિસિંજરે રાષ્ટ્રપતિ રિચાર્ડ નિક્સન અને ગેરાલ્ડ ફોર્ડના કાર્યકાળ દરમિયાન અમેરિકાના રાષ્ટ્રીય સુરક્ષા સલાહકાર અને સેક્રેટરી ઑફ સ્ટેટ તરીકે સેવા આપી છે . તેમણે આ વર્ષે 27 મેના રોજ પોતાનો 100મો જન્મદિવસ ઉજવ્યો હતો.
હેનરી કિસિંજર આધુનિક અમેરિકન ઇતિહાસમાં સૌથી મહત્વપૂર્ણ પુરુષોમાંના એક છે. તેમણે વિયેતનામ યુદ્ધને સમાપ્ત કરવામાં અને અમેરિકન દળોને પાછા ખેંચવામાં મોટી ભૂમિકા ભજવી હતી. તેઓ એકમાત્ર એવા નેતા હતા જે વિદેશ પ્રધાન હોવાની સાથે વ્હાઇટ હાઉસના રાષ્ટ્રીય સુરક્ષા સલાહકાર પણ હતા અને બંને પદ એક સાથે સંભાળ્યા હતા.
1971માં ભારત-પાકિસ્તાન યુદ્ધ દરમિયાન તેમની ભૂમિકા ખૂબ જ વિવાદાસ્પદ રહી હતી. આ યુદ્ધને કારણે વિશ્વના નકશા પર સ્વતંત્ર દેશ બાંગ્લાદેશનો ઉદય થયો.
અમેરિકન વિદેશ નીતિ પર તેમનો અન્ય કોઈપણ અમેરિકન પ્રમુખ કરતાં વધુ અંકુશ હતો. કિસિંજરનો જન્મ 1923માં જર્મનીમાં થયો હતો. નાઝી જર્મનીમાંથી ભાગીને યહૂદી ઇમિગ્રન્ટ તરીકે 1938માં તેઓ અમેરિકા આવ્યા હતા.
1943 માં, તેઓ યુએસ નાગરિક બન્યા અને ત્રણ વર્ષ સુધી યુએસ આર્મીમાં સેવા આપી. આ સિવાય તેણે કાઉન્ટર ઈન્ટેલિજન્સ કોર્પ્સમાં પણ કામ કર્યું હતું. 1969 માં, તત્કાલીન રાષ્ટ્રપતિ રિચાર્ડ નિક્સને તેમને રાષ્ટ્રીય સુરક્ષા સલાહકાર તરીકે નિયુક્ત કર્યા હતા.