Pakistan મા ઈદના દિવસે જ આતંકી હાફિઝ સઈદનો સાથી અબ્દુલ રહેમાન ઠાર…
કરાંચી : પાકિસ્તાનમા(Pakistan)ઈદના દિવસે જ આતંકી હાફિઝ સઈદના નજીકના સાથીને કરાંચીમા ઠાર મારવામાં આવ્યો છે. જેમાં લાંબા સમયથી પાકિસ્તાનમા એક પછી એક આતંકવાદીઓને અજાણ્યા બંદૂકધારીઓએ ઠાર મારી રહ્યા છે. ત્યારે હવે લશ્કર-એ-તૈયબા માટે ફંડ એકત્ર કરી રહેલા અબ્દુલ રહેમાન પર અજાણ્યા બંદૂકધારીઓએ ગોળીબાર કર્યો હતો જેમાં તેમનું મોત થયું છે. માનવામાં આવી રહ્યું છે કે, અબ્દુલ રહેમાન અહલ-એ-સુન્નત વાલ જમાતનો સ્થાનિક નેતા હતો. જે કરાચીમાં લશ્કર માટે ફંડ એકત્ર કરતો હતો. તેના એજન્ટો આખા વિસ્તારમાંથી ફંડ લાવતા હતા અને તેને તેની પાસે જમા કરાવતા હતા. ત્યારબાદ તે હાફિઝ સઈદને ફંડ પહોંચાડતો હતો.
પાકિસ્તાન આતંકવાદથી પીડિત
હાફિઝ સઈદના નજીકના સાથી પર આ હુમલો ત્યારે થયો જ્યારે તે તેના પિતા અને અન્ય લોકો સાથે હતો. આ હુમલામાં તેના પિતા સહિત ત્રણ લોકો ગંભીર રીતે ઘાયલ થયા હતા, જેમાં અબ્દુલ રહેમાનનું ઘટનાસ્થળે જ મોત નીપજ્યું હતું. પાકિસ્તાન છેલ્લા કેટલાક વર્ષોથી આતંકવાદથી પીડાઈ રહ્યું છે. એક તરફ, BLA અને તહરીક-એ-તાલિબાન બલુચિસ્તાનમાં પાકિસ્તાની સેનાને નિશાન બનાવી રહ્યા છે. બીજી તરફ, આતંકવાદીઓને એક પછી એક ઠાર કરવામાં આવી રહ્યા છે. હાફિઝ સઈદના નજીકના સાથીને નિશાન બનાવનાર વ્યક્તિને ન તો કોઈએ જોયો છે અને ન તો કોઈ તેને ઓળખે છે.
મુફ્તીની તાજેતરમાં ક્વેટામાં હત્યા કરવામાં આવી હતી
હાલમા ક્વેટામાં અજાણ્યા હુમલાખોરોએ જમિયત-ઉલેમા-એ-ઇસ્લામના મુફ્તી અબ્દુલ બાકી નૂરઝાઈની ગોળી મારીને હત્યા કરી દીધી હતી. ક્વેટા એરપોર્ટ નજીક નૂરઝાઈ પર ગોળીબાર કરવામાં આવ્યો હતો. જેમાં તે ગંભીર રીતે ઘાયલ થયો હતો અને હોસ્પિટલમાં સારવાર દરમિયાન તેનું મૃત્યુ થયું હતું.
આ પણ વાંચો : “ભારતમાં છે લઘુમતીઓથી નફરત” એસ. જયશંકરની ફટકાથી ફફડયું પાકિસ્તાન- કર્યા પાયાવિહોણા આરોપ
લશ્કરનો કમાન્ડર પણ માર્યો ગયો
અબ્દુલ રહેમાન પહેલા, પંજાબ પ્રાંતના ઝેલમ વિસ્તારમાં લશ્કર-એ-તૈયબાના ટોચના કમાન્ડર, ઝિયા-ઉર-રહેમાન ઉર્ફે નદીમ ઉર્ફે કતલ સિંધીની ગોળી મારીને હત્યા કરવામાં આવી હતી. નદીમ લશ્કરના સ્થાપક હાફિઝ સઈદનો વિશ્વાસુ માનવામાં આવતો હતો. જે જમ્મુ અને કાશ્મીરના પૂંછ-રાજૌરી વિસ્તારમાં આતંકવાદી પ્રવૃત્તિઓમાં સામેલ હતો. તે વર્ષ 2000ની શરૂઆતમાં જમ્મુ ક્ષેત્રમાં ઘૂસણખોરી કરી હતી અને વર્ષ 2005 માં પાકિસ્તાન પાછો ફર્યો હતો.