નિજ્જર વિવાદ વચ્ચે કેનેડાના નેતાએ કર્યું ભારતનું સમર્થન

ખાલિસ્તાની આતંકવાદી હરદીપ સિંહ નિજ્જરની હત્યા માટે ભારતને જવાબદાર ઠેરવ્યા બાદ કેનેડાના વડાપ્રધાન જસ્ટિન ટ્રુડોને ઘરઆંગણે ભારે વિરોધનો સામનો કરવો પડી રહ્યો છે. આ દરમિયાન, કેનેડાની કન્ઝર્વેટિવ પાર્ટીના વડા અને વિપક્ષી નેતા પિયરે પોલીવેરે એક મોટું નિવેદન આપ્યું છે. તેમણે કહ્યું છે કે આઠ વર્ષ સુધી સત્તામાં રહ્યા બાદ પણ પીએમ જસ્ટિન ટ્રુડો ભારત સાથેના સંબંધોની કિંમતને સમજી શક્યા નથી.

તેમણે કહ્યું કે જો તેઓ કેનેડાના વડાપ્રધાન બનશે તો બંને દેશો વચ્ચેના સંબંધો પુનઃસ્થાપિત કરશે. તેમણે કહ્યું હતું કે આપણે ભારત સરકાર સાથે વ્યાવસાયિક સંબંધો બનાવવાની જરૂર છે. ભારત વિશ્વની સૌથી મોટી લોકશાહી છે. બે દેશો વચ્ચે મતભેદ હોય એ ઠીક છે પણ બંને વચ્ચેના સંબંધો વ્યાવસાયિક હોવા જોઈએ. તેમણે કહ્યું હતું કે જો હું કેનેડાનો વડાપ્રધાન બનીશ તો ભારત સાથે સંબંધો પુનઃસ્થાપિત કરીશ.

તે જ સમયે, તેમણે ટ્રુડો પર 41 કેનેડિયન રાજદ્વારીઓને ભારતમાંથી પાછા બોલાવવાનો પણ આરોપ મૂક્યો હતો અને કહ્યું હતું કે તેઓ અસમર્થ અને બિનવ્યાવસાયિક છે. આજે ભારત સહિત વિશ્વના ઘણા મોટા દેશો સાથે કેનેડાના મતભેદો છે. એટલું જ નહીં, કેનેડામાં હિંદુ મંદિરોમાં તોડફોડના સમાચાર પર તેમણે કહ્યું કે મને લાગે છે કે હિંદુ મંદિરો પર હુમલો કરનારા અને સંપત્તિમાં તોડફોડ કરનારાઓ સામે ફોજદારી કેસ દાખલ કરવા જોઈએ.