મહેસાણા: ગુજરાતમાં વિવિધ ચાર ઝોનમાં વાયબ્રન્ટ ગુજરાત રીજનલ કોન્ફરન્સનું આયોજન કરવામાં આવ્યું છે. જેમાં તા. ૯ અને ૧૦ ઓક્ટોબર-૨૦૨૫ દરમિયાન મહેસાણા ખાતે ઉત્તર ગુજરાત વાયબ્રન્ટ ગુજરાત રીજનલ કોન્ફરન્સનું આયોજન કરવામાં આવ્યું છે. જેમાં વિવિધ પાંચ કેટેગરીમાં માઈક્રો સ્મોલ એન્ટરપ્રાઈઝ-MSE એવોર્ડ આપવામાં આવશે. તે ઉપરાંત આ કોન્ફરન્સમાં ભારત સરકારના રેલવે પ્રધાન અશ્વિની વૈષ્ણવ; ઇસરોના ચેરમેન ડૉ. વી.નારાયણન અને ભારતીય વાયુ સેનામાં ગ્રુપ કેપ્ટન અને ભારતના અંતરિક્ષ યાત્રી શુભાંશુ શુક્લા પણ ઉપસ્થિત રહેશે.
ઉત્તર ગુજરાત વાયબ્રન્ટ ગુજરાત રીજનલ કોન્ફરન્સનું ગણપત યુનિવર્સિટી, મહેસાણા ખાતે આયોજન કરાયું છે. જેમાં વિવિધ વિષયો અંગે સેમિનારો, B2B, B2G બેઠકો, પ્રદર્શનો યોજાશે. MSME ક્ષેત્રના ઉદ્યોગો માટે તા. ૧૦ ઓક્ટોબરે MSME કોન્ક્લેવનું આયોજન કરવામાં આવ્યું છે. જેમાં મહેસાણા, પાટણ, સાબરકાંઠા, બનાસકાંઠા, અરવલ્લી જિલ્લાઓના ઉદ્યોગકારો સહભાગી થશે. જેમાં પેનલ ડીસ્કશન, એક્ઝીબિશન તથા વેન્ડર ડેવલપમેન્ટના કાર્યક્રમો યોજાશે આયોજન છે.
ઉત્તર ગુજરાતના મહેસાણા, પાટણ, સાબરકાંઠા, બનાસકાંઠા, અરવલ્લી જિલ્લાઓના માઇક્રો તથા સ્મોલ એકમો માટે ઉત્ક્રૃષ્ટ પર્ફોર્મન્સ આધારીત વિવિધ પાંચ કેટેગરીમાં એવોર્ડ આપવામાં આવશે. જેમાં મહિલા ઉદ્યોગ સાહસિક – ૫૧ ટકા અને તેથી વધુ મહિલાઓની માલિકી ધરાવતા એકમો, યુવા ઉદ્યોગ સાહસિક, અનુસૂચિત જાતિ અને અનુસૂચિત જનજાતિ ઉદ્યોગ તથા જનરલ કેટેગરી એવોર્ડ કે જેમાં ઉદ્યોગકારોનો ઉપરની કેટેગરીમાં સમાવેશ થતો નથી તે ઉદ્યોગકારો આ જનરલ કેટેગરીમાં અરજી કરી શકશે.
મહેસાણા ખાતે વાયબ્રન્ટ ગુજરાત પ્રાદેશિક સંમેલનમાં MSME કોન્કલેવ, ઉદ્યમિતા સહાય મેળા, વેન્ડર ડેવલપમેન્ટ કાર્યક્રમનું આયોજન છે. આ સંમેલનમાં રીવર્સ બાયર્સ સેલર મીટ, પ્રાદેશિક પુરસ્કારો એનાયત તેમજ અગ્રણી ઉદ્યોગપતિઓ, બિઝનેસ લીડર્સ તેમજ યુવાનો તેમની વિકાસ યાત્રાનો અનુભવ તેમજ આ પ્રદેશો વિકસિત ગુજરાત@2047ના વિઝનમાં કેવી રીતે યોગદાન આપી શકે તેના વિશે ચર્ચા કરશે. સ્ટાર્ટઅપ હેકાથોન, સ્ટાર્ટઅપ્સ દ્વારા પિચિંગ સેશન અને ઉદ્યોગ સાહસિકોના ઉત્પાદનોનું પ્રદર્શન યોજવામાં આવશે.
500થી વધુ બેઠકોનું આયોજન
ઉદ્ઘાટન સમારોહ પહેલા મુખ્ય પ્રધાન તેમજ અન્ય મહાનુભાવો VGRC પ્રદર્શનની મુલાકાત લેશે. પ્રદર્શનના ભાગરૂપે, દૂધસાગર ડેરી, ONGC, વેસ્ટર્ન રેલ્વે અને મકેન ફૂડ્સ જેવી સંસ્થાઓ સાથે વેન્ડર ડેવલપમેન્ટ પ્રોગ્રામ (VDP)નું આયોજન કરવામાં આવશે, જેનો હેતુ ઉદ્યોગ જોડાણોને મજબૂત બનાવવા અને સ્થાનિક ઉદ્યોગોના વિકાસને પ્રોત્સાહન આપવાનો છે. વધુમાં, રિવર્સ બાયર-સેલર મીટમાં (RBSM) 17 દેશોના 34 આંતરરાષ્ટ્રીય ખરીદદારોને ભાગ લેશે, જેનાથી વેપાર અને વ્યવસાયની તકોને પ્રોત્સાહન મળશે. આ દરમિયાન ખરીદદારો અને સ્થાનિક વિક્રેતાઓ વચ્ચે નિકાસને પ્રોત્સાહન આપવા માટે 500થી વધુ બેઠકોનું આયોજન કરવામાં આવ્યું છે.
ઉત્તર ગુજરાત VGRCમાં આંતરરાષ્ટ્રીય સહભાગિતા પણ વ્યાપક રીતે જોવા મળશે. જેમાં ભાગીદાર દેશોમાં જાપાન, દક્ષિણ કોરિયા અને વિયેતનામ સામેલ છે. કૃષિ ક્ષેત્ર સાથે સંબંધિત વિશેષ સેમિનારો માટે નેધરલેન્ડ પણ એક ભાગીદાર દેશ તરીકે જોડાશે. આ આયોજનમાં વિશ્વ બેન્ક, જાપાન એક્સ્ટર્નલ ટ્રેડ ઓર્ગેનાઇઝેશન (JETRO), રશિયન સંઘનું વ્યાપાર પ્રતિનિધિમંડળ, ઇન્ડો-કેનેડિયન બિઝનેસ ચૅમ્બર (ICBC) અને યુએસ-ઇન્ડિયા સ્ટ્રેટેજિક પાર્ટનરશિપ ફોરમ (USISPF) જેવી પ્રતિષ્ઠિત સંસ્થાઓની ભાગીદારી રહેશે.લગભગ 18 હજાર વર્ગ મીટરના વિશાળ પ્રદર્શન ક્ષેત્રમાં ટ્રેડ શૉનું આયોજન કરવામાં આવ્યું છે, જેમાં કૃષિ અને ખાદ્ય પ્રક્રિયા તેમજ નવીનીકરણીય ઊર્જા ક્ષેત્ર સાથે સંકળાયેલા 400થી વધુ પ્રદર્શકો ભાગ લેશે.
આંતરરાષ્ટ્રીય પેવેલિયનોની પણ વ્યવસ્થા
તે સિવાય ટોરેન્ટ, વેલ્સ્પન, NHPC, NTPC, કોસોલ, સુઝલોન, અવાડા, નિરમા, INOX, અદાણી, મારુતિ સુઝુકી, પાવરગ્રીડ કૉર્પોરેશન લિમિટેડ અને ONGC જેવી અગ્રણી કોર્પોરેટ કંપનીઓ પણ જોડાશે. ઉભરતી તકો અને ટકાઉ નવીનતાઓને પ્રકાશિત કરવા માટે આ કાર્યક્રમમાં જાહેર ક્ષેત્રના એકમો, MSMEs, કુટીર ઉદ્યોગો અને ગ્રામીણ સ્ટાર્ટઅપ્સ સહિત કૃષિ-ટેક, ગ્રીન એનર્જી અને ફૂડ-ટેક માટે વિશેષ પેવેલિયન સ્થાપિત કરવામાં આવશે. જે ભારતની ઉદ્યોગસાહસિકતાની ઇકોસિસ્ટમનું વૈવિધ્યસભર પ્રદર્શન કરશે. ભારતની વધી રહેલી આંતરરાષ્ટ્રીય ભાગીદારીને ધ્યાનમાં રાખીને આ સમારોહમાં જાપાન, દક્ષિણ કોરિયા અને વિયેતનામ માટે વિશેષ આંતરરાષ્ટ્રીય પેવેલિયનોની પણ વ્યવસ્થા કરવામાં આવશે. જે દ્વિપક્ષીય વ્યાપાર, રોકાણ ભાગીદારી અને ટેક્નોલોજીના આદાન-પ્રદાનને પ્રોત્સાહન આપશે.
આ પણ વાંચો…ગુજરાતમાં વાયબ્રન્ટ સમિટ, પણ રોકાણ થાય છે મહારાષ્ટ્રમાંઃ જાણો આંકડા શું કહે છે…
