વિજાપુરના 92 ખેડૂતના 9 કરોડ લઈ બાપ-દીકરો વિદેશ ભાગી ગયા, આ રીતે ફૂટ્યો ભાંડો…
મહેસાણાઃ જિલ્લાના વિજાપુરમાં એક ચોંકાવનારો કિસ્સો બન્યો હતો. 90 ખેડૂત સાથે બાપ-દીકરાએ 9 કરોડથી વધુની છેતરપિંડી આચરી હતી અને વિદેશ ભાગી ગયા હતા, પરંતુ આ છેતરપિંડીનો પર્દાફાશ કરવામાં આવ્યો છે.
મળતી વિગત પ્રમાણે, વિજાપુર તાલુકાના ટોટીદણ ગામમાં રહેતા પ્રહલાદ પટેલ અને તેના દીકરા નરેન્દ્રએ ભેગા મળી કુકરવાડા ગામમાં આવેલી માર્કેટયાર્ડમાં પેઢી ખોલી હતી અને એ પેઢીમાં તેઓ ખેડૂતો પાસેથી માલની આપ-લે કરતા હતા. આ પેઢી છેલ્લા 50 વર્ષથી ચાલતી હોવાથી અહીંયા પાક વેચાણ કે લેવા આવતા ખેડૂતો સાથે ઘર જેવો સબંધ થઈ ગયો હતો.
પેઢીનું શટર બંધ કરીને ભાગ્યા
ખેડૂતોનો વિશ્વાસ જીત્યા બાદ બાપ-દીકરાએ અલગ-અલગ ગામના 90થી વધુ ખેડૂતોને અમારે ધંધામાં પૈસાની ખૂબ જરૂર છે એમ કહી તેમના નામે લોન મેળવી હતી. આ રૂપિયા પોતાની પાસે રાખી પોતાના ખાતામાં જમા કરાવી લીધા હતા તેમ જ જે ખેડૂત પોતાના પાક વેચાણ કરવા આવે તેઓના પણ રૂપિયા આ બાપ-દીકરા પેઢીમાં જમા રાખતા હતા અને બાદમાં બાપ-દીકરો પેઢીનું શટર બંધ કરીને ઓસ્ટ્રેલિયા ભાગી ગયા હતા.
પોલીસે શું કહ્યું?
ખેડૂતો આરોપીના ઘરે અને પેઢી પર જતાં ત્યાં તાળા લટકતા જોવા મળ્યા હતા. બાદમાં બધાએ હિસાબ માંડતા બાપ-દીકરાએ 9 કરોડથી વધુની છેતરપિંડી આચરી હોવાની ફરિયાદ વસાઈ પોલીસમાં નોંધાઈ હતી. વિસનગર ડિવિઝનના ડીવાયએસપી દિનેશસિંહ ચૌહાણે જણાવ્યું કે, વસઈમાં 9 કરોડથી વધુની છેતરપિંડીની ફરિયાદ નોંધાઈ છે. હાલ પોલીસ તપાસ કરી રહી છે. પોલીસ તપાસ બાદ ઠગાઇનો એક્ઝેટ આંકડો સામે આવશે અને કુલ કેટલા ખેડૂતો ભોગ બન્યા એ તપાસ બાદ કહી શકાશે.
