ગાંધીનગરમાં Pet Dog રાખવા માટે નિયમ પાળવા પડશે: જાણો કયા 14 નિયમોનું કરવું પડશે પાલન?
ગાંધીનગર: મહાનગરપાલિકા (GMC) એ શહેરને ‘રેબીસ-મુક્ત શહેર’ અને ‘એનિમલ બર્થ કંટ્રોલ’ જેવી પહેલ હેઠળ પાલતુ શ્વાન (Pet Dogs) માટે રજિસ્ટ્રેશન ફરજિયાત બનાવ્યું છે. આજે મળેલી મ્યુનિસિપલ કોર્પોરેશનની સ્ટેન્ડિંગ કમિટીની બેઠકમાં આ અંગેના નવા નિયમોના સેટને મંજૂરી આપવામાં આવી હતી. અમદાવાદમાં પાલતુ શ્વાનના કરડવાના બનાવો બાદ ગાંધીનગરમાં આવી ઘટનાઓ અટકાવવા માટે મ્યુનિસિપલ કોર્પોરેશને નિયમો કડક બનાવ્યા છે. જોકે, પાલતુ શ્વાનનું રજિસ્ટ્રેશન 1 જુલાઈ, 2025થી શરૂ થઈ ગયું હતું, પરંતુ હવે કમિટીની મંજૂરી મળતાં નિયમોનું અમલ શરૂ કરવામાં આવશે.
નવા નિયમો હેઠળ શ્વાન માલિકોની જવાબદારી સ્પષ્ટપણે નક્કી કરવામાં આવી છે. કુલ 14 નિયમો ઘડવામાં આવ્યા છે, જે અંતર્ગત રજિસ્ટ્રેશન કરાવવા માટે માલિકે શ્વાનનું રસીકરણ પ્રમાણપત્ર, શ્વાન અને માલિકના ફોટોગ્રાફ્સ, માલિકનો આધાર કાર્ડ અને ₹200ની રજિસ્ટ્રેશન ફી જમા કરાવવી પડશે. આ ઉપરાંત, માલિકોએ તેમના પાલતુ શ્વાનને પૂરતું પોષણ અને સંભાળ પૂરી પાડવાની પણ ખાતરી કરવી પડશે. જો માલિક આ જવાબદારીઓનું પાલન કરવામાં નિષ્ફળ જશે, તો ‘ક્વોલિટી ઓફ એનિમલ એક્ટ’ હેઠળ તેમની સામે કાર્યવાહી થઈ શકે છે.
કોર્પોરેશને વધુમાં જણાવ્યું છે કે જો પાલતુ શ્વાન કોઈ રહેવાસી કે રાહદારીને નુકસાન પહોંચાડશે, તો તેની સંપૂર્ણ જવાબદારી શ્વાન માલિકની રહેશે. આ નિયમો ખાસ કરીને જાહેર સુરક્ષાને ધ્યાનમાં રાખીને બનાવવામાં આવ્યા છે. 18 વર્ષથી ઓછી ઉંમરના બાળકોને પાલતુ શ્વાનને ઘરની બહાર લઈ જવાની મંજૂરી આપવામાં આવશે નહીં.
સાથે જ, જો શ્વાન જાહેર વિસ્તારોમાં મળત્યાગ કરે કે અન્ય કોઈ અસુવિધા ઊભી કરે, તો તેવા કિસ્સાઓમાં પણ માલિકો જવાબદાર ગણાશે. આ નિર્ણય ગાંધીનગરને રેબીસ-મુક્ત અને વધુ સુરક્ષિત શહેર બનાવવા તરફનું એક મહત્વનું પગલું છે.
આપણ વાંચો: વડોદરામાં JP નડ્ડાના મંચની સામે SPG કમાન્ડો ઢળી પડ્યો, છતાં નેતાઓના પેટનું પાણી ન હલ્યું!
