ગુજરાતમાં 108 ની સરાહનીય કામગીરી, નવેમ્બર 2025 સુધી 82.78 લાખ કેસમાં ઈમરજન્સી સેવા પૂરી પાડી…
ગાંધીનગર : ગુજરાતના 108 ઈમરજન્સી સર્વિસે નવેમ્બર 2025 સુધી રાજ્યના સરાહનીય કામગીરી કરી છે. જેમાં કુલ 1.86 કરોડથી વધુ ઇમરજન્સી કોલ એટેન્ડ કરીને દર્દીઓને સફળતાપૂર્વક તાત્કાલિક સેવાઓ પૂરી પાડવામાં આવી છે. આ ઉપરાંત 108 દ્વારા 60.23 લાખથી વધુ પ્રસૂતિ સંબંધિત ઈમરજન્સી તેમજ 22. 55 લાખથી વધુ માર્ગ અકસ્માતના કિસ્સામાં ઈમરજન્સી સેવાઓ આપવામાં આવી છે. તેમજ કુલ 18 લાખથી વધુ નાગરિકોના જીવ બચાવવામાં આવ્યા છે. તદુપરાંત એમ્બ્યુલન્સમાં 97,295 જેટલી સગર્ભા મહિલાઓની અને અન્ય સ્થળ પર 59,903 એમ કુલ 1.57 લાખથી વધુ સગર્ભા મહિલાઓની સફળ પ્રસૂતિ કરાવવામાં આવી છે.
ખિલખિલાટ વાનનો 1.37 કરોડથી વધુ લાભાર્થીઓએ લાભ લીધો
રાજ્યમાં 108 ઈમરજન્સી સર્વિસ ઉપરાંત અન્ય વિવિધ ઇમરજન્સી સેવાઓ પણ ઉપલબ્ધ કરાવવામાં આવે છે. જે અંતર્ગત સપ્ટેમ્બર 2012થી કાર્યરત 434 જેટલી ખિલખિલાટ વાનનો વર્ષ 2025 સુધીમાં 1.37 કરોડથી વધુ લાભાર્થીઓએ લાભ લીધો છે તેવી જ રીતે વર્ષ 2015થી શરૂ થયેલી 181 મહિલા હેલ્પલાઇન અંતર્ગત 17.40 લાખથી વધુ કોલ એટેન્ડ કરીને 59 વાન દ્વારા 3.47 લાખથી વધુ મહિલાઓને સ્થળ પર જરૂરી મદદ કરવામાં આવી છે.
ગુજરાતમાં બે 108 બોટ એમ્બ્યુલન્સ સેવા કાર્યરત
આ ઉપરાંત રાજ્યમાં વર્ષ 2017માં શરૂ કરાયેલી 104 હેલ્થ હેલ્પલાઇન દ્વારા વર્ષ 2025 સુધીમાં કુલ 52.29 લાખથી વધુ કોલ એટેન્ડ કરીને યોગ્ય માર્ગદર્શન આપવામાં આવ્યુ છે. વર્ષ 2018 માં શરૂ કરાયેલી 108 બોટ એમ્બ્યુલન્સ દ્વારા 758 જેટલા નાગરિકોનો આપાતકાલીન સેવાઓ આપવામાં આવી છે. હાલમાં ગુજરાતમાં બે 108 બોટ એમ્બ્યુલન્સ સેવા કાર્યરત છે. રાજ્યના 7 જિલ્લાઓમાં વર્ષ-૨૦૨૫થી કાર્યરત 112 ઇમરજન્સી સેવા અંતર્ગત 04 લાખથી વધુ ઇમરજન્સી કોલ જેમાં પોલીસ, ફાયર, મેડીકલ અને ડિઝાસ્ટર ઇમરજન્સી સંબંધિત કોલ એટેન્ડ કરવામાં આવ્યા છે તેમ, ઇ.એમ.આર.આઈ. ગ્રીન હેલ્થ સર્વિસની અખબારી યાદીમાં જણાવ્યું છે.
વર્ષ 2007માં રાજ્યમાં સૌ પ્રથમવાર શરૂ કરવામાં આવી
ગુજરાતમાં વર્ષ 2007 માં રાજ્યમાં સૌ પ્રથમવાર શરૂ કરાયેલી આરોગ્યલક્ષી 108 ઇમરજન્સી સેવા આજે અન્ય રાજ્યો માટે પથદર્શક અને આદર્શ મોડલ પૂરવાર થઇ છે. જે રાજ્યના દરેક શહેરો, જિલ્લા, તાલુકા અને છેવાડાના ગામ સુધી આજે 24*7 વિનામૂલ્યે સેવા આપી રહી છે. જે રાજ્યના કરોડો નાગરિકો માટે આશીર્વાદરૂપ બની છે.
