ગુજરાત પર ચાર વરસાદી સિસ્ટમ સક્રિય થઈ, રાજ્યમાં સિઝનનો સૌથી વધુ વરસાદ દક્ષિણ ગુજરાતમાં

અમદાવાદઃ ગુજરાતમાં ચોમાસની ગતિ ધીમી પડી છે. સ્ટેટ ઈમરજન્સી ઓપરેશન સેન્ટર ગાંધીનગર દ્વારા જાહેર કરવામાં આવેલા આંકડા મુજબ, રાજ્યમાં સિઝનનો સરેરાશ 64.62 ટકા વરસાદ વરસ્યો છે. કચ્છમાં 65.17 ટકા, ઉત્તર ગુજરાતમાં 66.21 ટકા, પૂર્વ મધ્યમાં 66.68 ટકા, સૌરાષ્ટ્રમાં 56.70 ટકા અને દક્ષિણ ગુજરાતમાં 69.10 ટકા વરસાદ વરસ્યો છે.

સરદાર સરોવર ડેમ તેની કુલ સંગ્રહ ક્ષમતાનો 75.19 ટકા ભરાયેલો છે. જ્યારે રાજ્યના અન્ય 206 જળાશયો તેમની કુલ સંગ્રહ ક્ષમતાના 70 ટકા ભરાયેલા છે. ચોમાસાની શરૂઆતમાં પડેલા વરસાદના કારણે રાજ્યમાં 30 ડેમ 100 ટકા ભરાયેલા છે, જ્યારે 51 ડેમ હાઈ એલર્ટ પર છે. 73 ડેમ 70 થી 100 ટકા ભરાયેલા છે અને 26 ડેમ એલર્ટ પર છે.

હવામાન વિભાગ મુજબ, રાજ્યમાં વરસાદ લાવે તેવી સિસ્ટમ સક્રિય થઈ છે. જેના કારણે 24 કલાક બાદ અનેક વિસ્તારોમાં ભારે વરસાદ પડી શકે છે. હવામાન વિભાગના સૂત્રોના જણાવ્યા પ્રમાણે, બંગાળની ખાડીમાં લો પ્રેશર સિસ્ટમ, કચ્છ પર અપર એર સાયક્લોનિક સર્ક્યુલેશન, પૂર્વ પશ્ચિમ મોન્સૂન ટ્રફ સહિત ચાર સિસ્ટમ સક્રિય છે. જેના કારણે વરસાદની તીવ્રતા વધશે. માછીમારોને 17 ઓગસ્ટ સુધી દરિયો નહીં ખેડવાની સૂચના આપવામાં આવી હતી.

રાજ્યમાં સાંજે 6 વાગ્યા સુધીમાં 49 તાલુકામાં ઝરમર વરસાદ વરસ્યો હતો. નવસારીના ખેરગામમાં સૌથી વધુ 1.22 ઇંચ વરસાદ નોંધાયો હતો. ઉમરગાવમાં 0.59 ઇંચ, વાપીમાં 0.51 ઇંચ, ગણદેવીમાં 0.51 ઇંચ, બારડોલીમાં 0.43 ઇંચ, ભેસાણમાં 0.39 ઇંચ, પારડીમાં 0.35 ઇંચ વરસાદ પડ્યો હતો.