રાજકોટમાં હોમ લોનનું કહી એજન્ટોએ 15% વ્યાજની બિઝનેસ લોન પધરાવી, ત્રાસથી યુવકે આપઘાત કર્યો
રાજકોટ: શહેરના એક યુવકે નોન-બેંકિંગ ફાઇનાન્સ કંપની (NBFC) ના એજન્ટો દ્વારા થતી કથિત સતામણીના કારણે આત્મહત્યા કરી હોવાનો આઘાતજનક બનાવ સામે આવ્યો છે. મૃતક દેવશંકર મહેતાને હોમ લોનને બદલે બિઝનેસ લોન લેવા માટે ગેરમાર્ગે દોરવામાં આવ્યા હતા અને તેમની પર ઊંચા વ્યાજ દર તેમજ દંડ સાથે EMI ચૂકવવા માટે દબાણ કરવામાં આવતું હતું.
27 સપ્ટેમ્બરના રોજ તમાકુના વેપારી દેવશંકર મહેતા તેમના ઘરે આપઘાત કરી લીધો હતો. તેમના ભાઈ ભરત મહેતાએ કોલ રેકોર્ડ અને લોનના દસ્તાવેજોની તપાસ કર્યા બાદ શુક્રવારે બી ડિવિઝન પોલીસ સ્ટેશનમાં સિદ્ધાર્થ ગોંડલિયા, સિદ્ધરાજ ગુજરાતીયા અને એક અજાણ્યા વ્યક્તિ વિરુદ્ધ આત્મહત્યા માટે ઉશ્કેરવા અને છેતરપિંડીની ફરિયાદ (FIR) દાખલ કરાવી હતી.
ફરિયાદની વિગતો અનુસાર, દેવશંકર હોમ લોન લેવા માગતા હતા પરંતુ લોન મેળવવામાં મુશ્કેલી પડી રહી હતી. આ દરમિયાન તેમનો સંપર્ક સિદ્ધાર્થ ગોંડલિયા સાથે થયો, જેણે NBFC દ્વારા લોનની વ્યવસ્થા કરાવી આપવાની ખાતરી આપી હતી. રૂ. 33 લાખની લોન મળ્યા બાદ મૃતકને જાણ થઈ કે આ લોન હોમ લોન નહીં પરંતુ માત્ર નાના વ્યવસાયો માટે ચાલતી બિઝનેસ લોન તરીકે વર્ગીકૃત કરવામાં આવી હતી અને તેનો વ્યાજ દર 15% જેટલો ઊંચો હતો.
અસંગઠિત ક્ષેત્રમાં કામ કરતા હોવાને કારણે દેવશંકરને સમયસર હપ્તા ચૂકવવામાં ઘણીવાર મુશ્કેલી પડતી હતી. FIRની વિગતો અનુસાર, એજન્ટો દ્વારા દરેક ચૂકવણી ચૂકી જવા બદલ રૂ. 3,000 નો દંડ વસૂલવામાં આવતો હતો. હપ્તાની નિયત તારીખના એક દિવસ પહેલા એજન્ટો દ્વારા કથિત રીતે ધમકીભર્યા કોલ આવતા હતા, અને NBFCના કસ્ટમર કેર વિભાગમાંથી પણ હિન્દીમાં ડરાવતા કોલ્સ આવતા હતા. ફરિયાદમાં આરોપ છે કે છેતરાયાની લાગણી અને સતત સતામણી સહન ન થવાને કારણે મૃતકે આત્મહત્યા કરી લીધી. પોલીસે આ મામલે તપાસ શરૂ કરી હતી.
