જૂનાગઢઃ સૌરાષ્ટ્ર પર મેઘરાજા આજે સવારથી જ મહેરબાન થયા છે. સવારે 6 થી 10ના ચાર કલાકમાં 90 તાલુકામાં વરસાદ વરસ્યો હતો. જૂનાગઢના મેંદરડામાં આભ ફાટ્યું હોય તેમ ચાર કલાકમાં 9.84 ઇંચ વરસાદ વરસતાં જળબંબાકારની સ્થિતિ સર્જાઈ હતી. વંથલીમાં 5.31 ઇંચ, કેશોદમાં 4.80 ઇંચ, મહુવા (ભાવનગર)માં 4.76 ઇંચ, તાલાલામાં 4.06 ઇંચ, રાજુલામાં 3.35 ઇંચ, સૂત્રાપાડામાં 2.80 ઇંચ, ગીર ગઢડામાં 2.64 ઇંચ, માંગરોળ (જૂનાગઢ)માં 2.56 ઇંચ, માળીયા હાટીનામાં 2.56 ઇંચ વરસાદ વરસ્યો હતો.
દામોદર કુંડમાં પાણીનો પ્રવાહ વધ્યો
જૂનાગઢ જિલ્લા અને તાલુકાઓમાં વરસાદ માહોલ સર્જાતા દામોદર કુંડમાં પાણીનો પ્રવાહ વધ્યો હતો. જૂનાગઢ જિલ્લા કલેકટર દ્વારા જળાશયો ઉપર અવરજવર ન કરવા પ્રતિબંધ મૂકવામાં આવ્યો હતો. જૂનાગઢની મધુવતી અને મેઘલ નદીમાં ઘોડાપૂર આવ્યું હતું. જૂનાગઢના ગ્રામ્ય પંથકમાં અનરાધાર વરસાદ વરસી રહ્યો છે. બગડુ નજીક આવેલ બંધૂકયો નદીમાં ઘોડાપૂર, કોઝવે પર પાણી ફરીવળ્યા હતા. નીચાણ વાળા વિસ્તારોને એલર્ટ કરાયા હતા.
કેશોદમાં મુખ્ય માર્ગો ખાસ કરીને બસ સ્ટેશન રોડ પર પાણી ભરાયા હતી. આ પાણી કેશોદના ગ્રામ્ય વિસ્તારોમાંથી શહેરમાં પ્રવેશ્યું હતું. પાણી ભરાવાને કારણે વાહનચાલકોને ઘણી મુશ્કેલીઓનો સામનો કરવો પડ્યો હતો. વરસાદની પાણી ભરાતા તાલાલાથી માધુપુર,પ્રાંચી,થઈને કોડીનાર જતો સ્ટેટ હાઇવે બંધ થયો હતો.
25 ઓગસ્ટ સુધી ભારે વરસાદની આગાહી
ગુજરાતમાં હવાવામાન વિભાગે આગામી 25 ઓગસ્ટ સુધી ભારે વરસાદની આગાહી કરી છે. આજે અમરેલી, ભાવનગર, વલસાડ, નવસારી અને સુરતમાં અતિભારે વરસાદની આગાહી સાથે રેડએલર્ટ જાહેર કરાયું છે. જ્યારે દ્વારકા, પોરબંદર, જુનાગઢ, ગીર સોમનાથ, દીવ, દાહોદ, પંચમહાલ, વડોદરા, છોટાઉદેપુર, ભરૂચ, નર્મદા, તાપી અને ડાંગમાં ભારે વરસાદને લઈને ઓરેન્જ એલર્ટ જાહેર કરાયું છે.
રાજ્યમાં સિઝનનો સરેરાશ 71.31 ટકા વરસાદ
રાજ્યમાં સિઝનનો સરેરાશ વરસાદ 71.31 ટકા થયો છે. કચ્છમાં સૌથી વધુ 74.63 ટકા, ઉત્તર ગુજરાતમાં 72.73 ટકા, પૂર્વ મધ્યમાં 69.92 ટકા, સૌરાષ્ટ્રમાં 69.06 ટકા અને દક્ષિણ ગુજરાતમાં 73.33 ટકા વરસાદ વરસ્યો હતો. સરદાર સરોવર ડેમ 74.48 ટકા ભરાયેલો છે. રાજ્યમાં 40 ડેમ 100 ટકા ભરાયેલા છે અને 64 ડેમ હાઇ એલર્ટ પર છે. રાજ્યમાં 24 ડેમમાં 25 ટકાથી ઓછો જળસંગ્રહ છે.
