જૂનાગઢઃ જૂનાગઢ શહેરમાં ગિરનાર પર્વત પાસે બે ત્રણ હરણ પ્લાસ્ટિક ખાતા હોય તેવો વીડિયો અમુક દિવસો પહેલા વાયરલ થયો હતો. સોશિયલ મીડિયા પર આ વીડિયો પોસ્ટ થતાં વન્યજીવપ્રેમીઓએ રોષ ઠાલવ્યો હતો અને વન્યપશુઓની સુરક્ષા અંગે સવાલો કર્યા હતા.
મુકેશ ખુંટ નામના એક સોશિયલ મીડિયા યુઝર દ્વારા આ વીડિયો શેર કરવામાં આવ્યો હતો અને ગિર વિસ્તારમાં પ્લાસ્ટિકને પ્રતિબંધિત કરવાના હાઈ કોર્ટેના આદેશ છતાં આવી સ્થિતિ છે અને પશુપ્રેમીઓ માટે આ દૃશ્યો હચમચાવી નાખનારા છે, તેમ તેમણે લખ્યું હતું. ત્યારબાદ રાજ્યસભાના સભ્ય પરિમલ નથવાણીએ પણ આ વીડિયો દુઃખ આપનારો અને ચિંતા જગાવનારો હોવાનું જણાવ્યું હતું. આ વીડિયો વાયરલ થતાં ગુજરાતના વનવિભાગના કેબિનેટ પ્રધાન અર્જુન મોઢવાડિયાએ સ્પષ્ટતા કરવાની ફરજ પડી હતી.
આ પણ વાંચો : શિયાળાની શરૂઆત થતા ગિરનાર ચડનારાઓની સંખ્યામાં જબરો વધારો
જૂનાગઢમાં ગિરનાર પર્વત નજીક હરણો પ્લાસ્ટિક ખાતા હોય તેવો એક વીડિયો વાયરલ થતાં વન્યજીવપ્રેમીઓમાં ભારે રોષ ફેલાયો હતો અને વન્યપશુઓની સુરક્ષા પર સવાલો ઉઠ્યા હતા. આ મામલે રાજ્યસભાના સભ્ય પરિમલ નથવાણીએ પણ ચિંતા વ્યક્ત કરી હતી. વીડિયો વાયરલ થયા બાદ ગુજરાતના વન વિભાગના કેબિનેટ પ્રધાન… pic.twitter.com/VHt6NJxTqe
— Mumbai Samachar Official (@Samachar_Mumbai) November 30, 2025
તેમણે જણાવ્યું હતું કે કચરાના ઢગથી ભરેલી આ જગ્યા એક ખાનગી પ્લોટ છે. જ્યારે આ બાબત વીડિયો દ્વારા ધ્યાનમાં આવી ત્યારે જૂનાગઢ મહાનગરપાલિકાએ વિસ્તારને તાત્કાલિક સાફ કરી દીધો હતો. આ સાથે પ્લોટના માલિક પર દંડ ફટકારવા આવશે અને આવી ઘટના ફરી ન બને તેના માટે વિશેષ ધ્યાન રાખવામાં આવશે. જોકે સરકાર અને તંત્ર પોતાની ફરજ બજાવે તે સાથે પર્યટકો અને સામાન્ય જનતાએ પણ ગમે ત્યાં કચરો ન ફેંકતા વધારે જવાબદારીથી વર્તવાની જરૂર છે.
