અમદાવાદઃ એશિયાટિક સિંહો હવે સાસણ ગીરના જંગલોમાંથી બહાર નીકળી ગામે ગામ પહોંચી ગયા છે ત્યારે માનવ વસ્તીમાં જઈ ચડતા સિંહો જીવનું જોખમ લાવે છે, પરંતુ રસ્તાઓ લટાર મારતા સિંહો જોવાનો લ્હાવો લોકો લેતા હોય છે. ગીર ગઢડાના જામવાળા રોડ પર રાત્રિના સમયે બે સિંહણ અને તેના ત્રણ સિંહબાળ જોવા મળ્યા હતા. જંગલની સરહદ નજીક આવેલા રેવન્યુ વિસ્તારમાં સિંહ પરિવારને લટાર મારતાં જોઈને ત્યાંથી પસાર થતા રાહદારીઓ થોભી ગયા હતા અને કેમેરામા આ દૃશ્યો કેદ કરી લીધા હતા
શિયાળાની ઋતુમાં એશિયાટિક સિંહો જંગલ વિસ્તાર છોડીને રેવન્યુ વિસ્તારો તરફ વધુ જોવા મળે છે. ખાસ કરીને સંધ્યાકાળના સમયે સિંહો શિકારની શોધમાં નીકળી પડે છે અને રાત્રિ દરમિયાન માનવ વસાહત ધરાવતા ગ્રામ્ય વિસ્તારોમાં ભમણ કરતાં પહોંચી જાય છે. રેવન્યુ જમીનમાં ખુલ્લા પટમાં સિંહ પરિવાર જાણે કે ફોટો સેશન કરતો હોય તેમ સિંહબાળ સાથે બેસી મોજમસ્તી કરતાં હોવાના પ્રસાર થતા રાહદારીઓ આ દૃશ્યોને પોતાના કેમેરામાં કેદ કર્યા હતા. આ દૃશ્યો જોઈને લોકો રોમાંચિત થઈ ઉઠ્યા હતા. ગીર ગઢડા જામવાળા રોડ વિસ્તાર સિંહોના વસવાટ માટે જાણીતો છે. સિંહપ્રેમીઓ સિંહ જોવા મળે કે ન મળે, પરંતુ આ વિસ્તારમાં સિંહ દર્શન માટે અહીં આવતા હોય છે.
આ પણ વાંચો : સાસણ ગીરના હાઈવે પર આવી ચઢ્યો સિંહ પરિવાર, લોકોને પણ મોજ પડી, જુઓ તસવીરો
વન વિભાગ દ્વારા આ ગીર ગઢડા જામવાળા રોડ પર સમયાંતરે પેટ્રોલિંગ કરવામાં આવે છે. જોકે, સિંહ અને માનવ વચ્ચેના સંઘર્ષને ટાળવા, સિંહોની પજવણી અટકાવવા અને તેમની સલામતી જાળવવા માટે નિયમિત પેટ્રોલિંગ અત્યંત જરૂરી છે. બીજી તરફ અમુક લોકો રાત્રિના સમયે સિંહોનું લોકેશન શોધવા નીકળી પડે છે અને ગ્રામ્ય વિસ્તારની સીમમાં લાઈટના પ્રકાશ પાડીને સિંહોને શોધવાનો પ્રયાસ કરે છે. આવા સ્થળોએ પણ વન વિભાગ દ્વારા નિયમિત પેટ્રોલિંગ રાખવામાં આવે તે આવશ્યક છે, જેથી ગીરના ઘરેણાં સમા એશિયાટિક સિંહોની આગવી ઓળખ અને સલામતી જળવાઈ રહે.
