ભાવનગર: હાલ રાજ્યના અનેક જિલ્લામાં વરસાદી માહોલ જામ્યો છે, જેના કારણે જંગલોના વનરાઈ સોળે કળાએ ખીલી ઉઠી છે. વળી આ દરમિયાન જ વન્યપ્રાણીઓના સંવનનકાળને કારણે અભ્યારણ્યો અને રાષ્ટ્રીય ઉદ્યાનમાં વેકેશન છે, પરંતુ આ સમય દરમિયાન જંગલના રાજા પરિવાર સહિત આંટો મારવા નીકળ્યા હોય તેવા દ્રશ્યો સામે આવ્યા હતા.
મળતી વિગતો અનુસાર આ વીડિયો ભાવનગર જિલ્લાના જેસર તાલુકાના શેવડીવદર ગામનો હોવાનું માનવામાં આવી રહ્યું છે. વીડિયોના દ્રશ્યોમાં એકસાથે માત્ર ચાર પાંચ નહિ પણ એકસાથે ૧૭ જેટલા સાવજોનું ઝુંડ જોવા મળ્યું હતું. આ સિંહ પરિવાર મધરાતના સમયે રસ્તો ક્રોસ કરતું જોવા મળ્યું હતું. આમ તો રાત્રિના સમયે સૂમસામ રોડ પર સાવજોના આગમન થયું ત્યારે રસ્તા પરથી પસાર થતા કોઈ વાહનચાલકે આ વીડિયો કેપ્ચર કર્યો હતો.
ઉલ્લેખનીય છે કે થોડા દિવસ પહેલા જ ભાવનગર જિલ્લાના પાલિતાણામાં એક સાથે 19 સિંહ મળ્યા જોવા મળ્યા હતા. ભાવનગર જિલ્લાના ડેપ્યુટી કન્ઝર્વેટર ઓફ ફોરેસ્ટ સાદિક મુંજાવર પાલિતાણા વન્યક્ષેત્રમાં પેટ્રોલિંગમાં ગયા હતા તે દરમિયાન તેમણે આ સિંહના ઝુંડને નિહાળ્યું હતું અને તેમનો ફોટો ક્લિક કર્યો હતો. તે ઉપરાંત, વર્ષ ૨૦૨૨માં પણ આવો જ એક ફોટો ફોટોગ્રાફરે કેમેરામાં કેદ કર્યો હતો
