અમદાવાદઃ સૌરાષ્ટ્રમાં ફરી અકસ્માતમાં સિંહણના મરણની ઘટના ઘટી હતી. રવિવારે મોડી રાત્રે અમરેલી જિલ્લાના જાફરાબાદ તાલુકાના હેમલ ગામ નજીક ભાવનગર-સોમનાથ રાષ્ટ્રીય ધોરીમાર્ગ પાર કરતી વખતે વાહનની ટક્કરથી એક સિંહણનું મોત થયું હતું.
વન વિભાગના અધિકારીઓએ જણાવ્યું હતું કે સિંહણને માથામાં ગંભીર ઈજા થઈ હતી અને તેનું ઘટનાસ્થળે જ મૃત્યુ થયું હતું. આ ઘટના સોમવારે વહેલી સવારે પ્રકાશમાં આવી હતી, ત્યારબાદ જાફરાબાદ રેન્જની એક ટીમ ઘટનાસ્થળે પહોંચી હતી. મૃતદેહને કબજે કરવામાં આવ્યો હતો અને પોસ્ટમોર્ટમ માટે બાબરકોટ એનિમલ કેર સેન્ટરમાં ખસેડવામાં આવ્યો હોવાનું સૂત્રોએ જણાવ્યું હતું.
વન વિભાગના અધિકારીઓના જણાવ્યા મુજબ, નજીકની હોટલો અને રાષ્ટ્રીય ધોરીમાર્ગ પરના સીસીટીવી ફૂટેજ ચેક કરવામાં આવ્યા હતા. જેથી વાહનની ઓળખ થઈ શકે. જવાબદાર ડ્રાઇવરને શોધવાના પ્રયાસો ચાલુ છે, કારણ કે વન રક્ષકો અને ટ્રેકર્સે તપાસ શરૂ કરી છે.
ભાવનગર-સોમનાથ નેશનલ હાઈ-વે, ખાસ કરીને રાજુલા-જાફરાબાદ પટ્ટો, એશિયાઈ સિંહો માટે જોખમી કોરિડોર માનવામાં આવે છે. સિંહો વારંવાર ટીંબી, ચેલના, હેમલ, દુધાળા, નાગેશ્રી, ચારનાળા, હિંડોરણા અને કડિયાલી જેવા ગામો નજીક રોડ ક્રોસ કરતા જોવા મળે છે, જેના કારણે ભૂતકાળમાં અનેક વન્યજીવોના મૃત્યુ થયા છે.
