અમદાવાદઃ ગુજરાતમાં હાલ ચોમાસું વિદાય લઇ રહ્યું છે, બીજી તરફ ભારે વરસાદની પણ આગાહી કરવામાં આવી હતી. હવામાન વિભાગે રાજ્યમાં સાત દિવસ વરસાદની આગાહી કરી હતી. બંગાળની ખાડીમાં સર્જાયેસલા ડીપ ડીપ્રેશનથી અમદાવાદમાં, ગાંધીનગરમાં વરસાદની આગાહી કરવામાં આવી હતી તેમ જ માછીમારોને ત્રણ દિવસ દરિયો નહીં ખેડવાની પણ સૂચના આપવામાં આવી હતી.
હવામાન વિભાગના જણાવ્યા પ્રમાણે બંગાળની ખાડીમાં ડિપ્રેશન સક્રિય થતાં વરસાદની સંભાવનાઓ છે. પશ્ચિમ અને દક્ષિણ ગુજરાતના જિલ્લાઓમાં ભારે વરસાદ વરસી શકે છે. મોરબીમાં યલો એલર્ટ સાથે ભારે વરસાદની આગાહી કરવામાં આવી હતી. આ ઉપરાંત દ્વારકા, પોરબંદર, જૂનાગઢ, બનાસકાંઠા, સાબરકાંઠા, અમદાવાદ અને ગાંધીનગરમાં ભારે વરસાદની સંભાવનાઓ છે. માછીમારોને આગામી ત્રણ દિવસ દરિયો નહીં ખેડવા સૂચના આપવામાં આવી હતી.
આ પણ વાંચો: વિજળીના ગડગડાટ સાથે મુંબઈમાં વરસાદ શરૂ; મુંબઈમાં રવિવારે રેડ અલર્ટ: ભારેથી અતિભારે વરસાદની આગાહી
રાજ્યમાં મોસમનો કુલ સરેરાશ વરસાદ 116.33 ટકા નોંધાયો છે, સૌથી વધુ કચ્છમાં 142.51 ટકા સરેરાશ વરસાદ નોંધાયો છે, ઉત્તર ગુજરાતમાં 120.54 ટકા, પૂર્વ મધ્ય ગુજરાતમાં 115.82 ટકા, દક્ષિણ ગુજરાતમાં 122.28 ટકા અને સૌથી ઓછો સૌરાષ્ટ્રમાં 105.24 ટકા સરેરાશ વરસાદ વરસ્યો છે.
સરદાર સરોવર નર્મદા ડેમ 2017માં રાષ્ટ્રાર્પણ પછી છઠ્ઠી વખત 138.68 મીટરની પૂર્ણ સપાટીએ છલકાયો હતો. રાજ્યના 206 જળાશયોમાં 96.41 ટકા જળસંગ્રહ છે. હાલ 152 ડેમ હાઈ એલર્ટ પર છે, જ્યારે 123 ડેમ સો ટકા ભરાયેલા છે. રાજ્યમાં પંચાયત હસ્તકના 60 સહિત કુલ 69 રોડ રસ્તા બંધ છે
