અમદાવાદના નિકોલમાં કન્સ્ટ્રક્શન સાઈટ પર ભેખડ ધસી પડી, એકનું મોત

અમદાવાદઃ શહેરના નિકોલ વિસ્તારમાં કન્સ્ટ્ર્કશન સાઈટ પર ભેખડ ધસી પડી હતી. જેમાં 2 વ્યક્તિ દબાયા હતા. ઘટનાની જાણ થતાં ફાયરબ્રિગેડનો કાફલો સ્થળ પર પહોંચ્યો હતો અને કામગીરી શરૂ કરી હતી. બેમાંથી એકને બહાર કાઢી હોસ્પિટલ લઈ જવામાં આવ્યો હતો. મળતી માહિતી અનુસાર, કિંગ સ્ટોન કન્સ્ટ્રકશન સાઈટ પર બની રહેલી બિલ્ડિંગની ભેખડ ધસી પડતા તેની નીચે બે શ્રમિકો દબાયા હતા. દુર્ઘટના પછી ફાયરબ્રિગેડ અને ઓઢવ પોલીસે રેસ્ક્યૂ કામગીરી કરી શરૂ કરી હતી.

Also read: અમદાવાદના નિકોલમાં આગ લાગતા માલિક અને કામદારનું મોત

અમદાવાદ ફાયર બ્રિગેડને કંટ્રોલ મેસેજ મળ્યો હતો કે નિકોલ- વિરાટનગર રોડ પર મનમોહન પાર્ક ચાર રસ્તા નજીક નવી બનતી કન્સ્ટ્રક્શન સાઈટના ખોદકામ દરમિયાન ભેખડ ઘસી પડવાની ઘટના બની છે અને કેટલાક લોકો દટાયા છે. જેથી ફાયર સ્ટેશનની બેથી વધુ ગાડીઓ ઘટના સ્થળે રવાના કરવામાં આવી હતી. ફાયરના જવાનો દ્વારા રેસ્ક્યુ શરૂ કરીને એક વ્યક્તિને સભાન હાલતમાં બહાર કાઢ્યો હતો અને સારવાર અર્થે 108માં હોસ્પિટલ ખાતે ખસેડવામાં આવ્યો હતો. જ્યારે બીજા વ્યક્તિને પણ 15 થી 20 મિનિટમાં બહાર કાઢી લેવામાં આવ્યો હતો. બંનેને સારવાર અર્થે ખાનગી હોસ્પિટલમાં ખસેડવામાં આવ્યા હતા. સારવાર દરમિયાન એકનું મોત થયું હતું.