વડોદરામાં અવાજ પ્રદૂષણ રોકવા કડક નિયમો લાગુઃ રાતના દસથી સવારે છ દરમિયાન હોર્ન, DJ અને માઈક સિસ્ટમ પર નિયંત્રણ
વડોદરા: શહેરમાં જાહેર સુલેહ-શાંતિ અને કાયદો વ્યવસ્થા જાળવવા માટે શહેર પોલીસ કમિશનર દ્વારા એક મહત્વપૂર્ણ હુકમ બહાર પાડવામાં આવ્યો છે. શહેરમાં અવાજ પ્રદૂષણ ફેલાવતી પ્રવૃત્તિઓ પર નિયંત્રણ મુકવામાં આવ્યું છે. આ હુકમનો અમલ આગામી ૨૫ જુલાઈ સુધી કરવાનો રહેશે. આ આદેશ ભારતીય નાગરિક સુરક્ષા સંહિતા – ૨૦૨૩ની કલમ – ૧૬૩ તથા ગુજરાત પોલીસ એક્ટ કલમ ૩૩(૧) અને ૩૭(૧)(એફ) હેઠળ જારી કરવામાં આવ્યું છે.
સામાન્ય રીતે તહેવારો દરમિયાન, લગ્ન પ્રસંગો, મેળાવડા દરમિયાન લાઉડ સ્પીકર, ડ્રમ, પબ્લિક એડ્રેસ સીસ્ટમના ઉપયોગની ધ્વનિ પ્રદૂષણ ફેલાય છે. રહેણાંક વિસ્તારમાં થઇ રહેલ ઔદ્યોગિક પ્રવૃત્તિ, વાહનોની અવરજવર અને હોર્ન વગાડવાને કારણે તથા બાંધકામ દરમિયાન ઉપયોગમાં લેવામાં આવતા સાધનોને કારણે પણ ધ્વનિ પ્રદૂષણ ફેલાય છે. આથી રાત્રે ૧૦ થી સવારે ૬ વાગ્યા સુધી નિયત કરવામાં આવેલા સમયમાં હોર્ન સહિત ધ્વનિ પ્રદૂષણ કરતા સાધનો વગાડવા પર પ્રતિબંધ છે.
માઈક સિસ્ટમ અને DJ ના ઉપયોગ પર નિયંત્રણો
હુકમ અનુસાર, માઇક સીસ્ટમ ભાડે આપનાર માલિક, ભાગીદાર, સંચાલક, મેનેજર, ઇવેન્ટ મેનેજર સમગ્ર વડોદરા શહેરના હુકમત વિસ્તારમાં વરઘોડા, રાજયકીય, સામાજિક અથવા ધાર્મિક શોભાયાત્રા, રેલી સરઘસમાં જાહેર રસ્તા કે જગ્યામાં ઉપયોગ માટે ખાનગી માલિકીની ખુલ્લી જગ્યામાં ઉપયોગ માટે માઇક સિસ્ટમ ભાડે આપી શકશે નહી.
હોસ્પિટલ, શૈક્ષણિક સંસ્થાઓ, અદાલતો અને ધાર્મિક સ્થળોની આજુબાજુના ૧૦૦ મીટરના ઘેરાવા વિસ્તારને શાંત તરીકે ગણવામાં આવે છે જેથી શાંત વિસ્તારની આજુબાજુમાં માઇક સિસ્ટમનો ઉપયોગ થઇ શકશે નહિ. એકબીજાને ઉશ્કેરણી થાય તેવા ગાયનો-ઉચ્ચારણોનો માઇક સિસ્ટમમાં ઉપયોગ કરવો નહિ. રસ્તાની ડાબી બાજુ ચાલવા, ટ્રાફિકને અડચણ થાય નહીં તથા ટ્રાફિકના તમામ નિયમો-કાયદાઓનો અમલ કરવા તેમ જ નાચગાન-ગરબા જાહેરમાર્ગ રોકાઇ તે રીતે કરવા નહિ.
૨૫મી જુલાઈ સુધી રહશે અમલ
ડી. જે. સીસ્ટમ વગાડવા માટે જણાવ્યું તે તમામ પ્રાવધાનોનો અને જોગવાઇઓનો ઉલ્લંઘન કરતા હોય તેવું જાહેર જગ્યાએ ખુલ્લા સ્થળો પર વગાડવા પર પ્રતિબંધ છે. માઇક સીસ્ટમ વગાડવા માટેના પ્રતિબંધો માંથી છૂટછાટ માટેની શરતો પણ છે જેને ધ્યાને લેવાની રહેશે. વડોદરા શહેર પોલીસ કમિશનરેટ વિસ્તારમાં આ જાહેરનામાનો ૨૫ જુલાઈ સુધી અમલ કરવાનો રહેશે.
આપણ વાંચો: ગોંડલમાં કરંટ લાગતાં પીજીવીસીએલના બે વીજ કર્મચારીના કરૂણ મોત
ડેસિબલ મર્યાદાનું પાલન ફરજિયાત
ગુજરાત પોલ્યુશન કંટ્રોલ બોર્ડ અને પર્યાવરણ વિભાગ દ્વારા પ્રકાશિત ધ્વનિ પ્રદૂષણ નિયમો-૨૦૦૦ મુજબ, ધ્વનિની માત્રાના ધોરણોનું પાલન કરવાનું રહેશે. વિવિધ વિસ્તારો માટે નીચે મુજબની ડેસિબલ મર્યાદા નક્કી કરવામાં આવી છે:
સવારના છ વાગ્યાથી રાતના ૧૦ દરમિયાન :
ઔદ્યોગિક વિસ્તાર:- ૭૫ ડેસિબલ
વાણિજ્ય વિસ્તાર:- ૬૫ ડેસિબલ
રહેણાંક વિસ્તાર:- ૫૫ ડેસિબલ
શાંત વિસ્તાર:- ૫૦ ડેસિબલ
રાત્રે ૧૦ થી સવારે ૬ દરમિયાન:
ઔદ્યોગિક વિસ્તાર:- ૭૦ ડેસિબલ
વાણિજ્ય વિસ્તાર:- ૫૫ ડેસિબલ
રહેણાંક વિસ્તાર:- ૪૫ ડેસિબલ
શાંત વિસ્તાર:- ૪૦ ડેસિબલ
