જમીન પચાવવા બન્યા નકલી સરદાર પટેલ, કોર્ટે ફટકારી 5 વર્ષની સજા

નડિયાદઃ અખંડ ભારતના શિલ્પી સરદાર વલ્લભભાઈ પટેલના નામે ખેડા જિલ્લાના મહેમદાવાદ તાલુકાના ગાડવા ખાતે આવેલી જમીન પચાવી પાડવાનો કારસો રચાયો હતો. ગુજરાત પ્રાંતિય સમિતીની જમીનમાં માલિક તરીકે વલ્લભભાઈ ઝવેરભાઈ પટેલનું નામ ચાલતું હતું. રેકર્ડ કોમ્પ્યુટરાઈઝ થતાં તેમાં થોડો ફેરફાર થયો હતો. તેમજ જમીન જૂની શરતની થયેલી. જેનો લાભ લઈ ખોટી રીતે વલ્લભભાઈ ઝવેરભાઈ પટેલનું નામ ધારણ કરાવી નકલી સાક્ષીઓ ઉભા કરાવી બારોબાર જમીનનો વેચાણ દસ્તાવેજ કરાવી લેવાયો હતો. સમગ્ર મામલામાં મહેમદાવાદ એડિશનલ કોર્ટ દ્વારા ત્રણ આરોપીઓને તકસીરવાન ઠરાવી જુદી જુદી કલમો હેઠળ પાંચ વર્ષની કેદની સજા ફટકારવામાં આવી હતી.. ટ્રાયલ દરમિયાન એક આરોપીનું કુદરતી મૃત્યું નિપજ્યુ હતું.

આ પણ વાંચો:  ભારતે કુદરતી હીરાના ઝવેરાત માટે ચીનને પાછળ ધકેલ્યું

સમગ્ર કેસ સામે આવતા નકલી સરદાર પટેલ હોવાનું સામે આવ્યું હતું અને બારોબાર સરદાર પટેલ બની જમીન પચાવી પાડી હતી. 2004માં રેકર્ડ કમ્પ્યુટરાઈઝ થતાં તેમાં આગળથી કેટલાક શબ્દો નીકળી ગયા હતા. તેમજ 2009માં જૂની શરતની જમીન થતાં તેનો લાભ લેવા કારસો રચાયો હતો. 2010માં સબ રજીસ્ટ્રાર કચેરી ખાતે વેચાણ દસ્તાવેજ રજીસ્ટર્ડ કરાવી લીધો હતો. જે બાદ વેચાણ રાખનાર ભૂપેન્દ્રભાઈ ડાભીએ રેવન્યુ રેકર્ડમાં માલિકી હકે પોતાનું નામ દાખલ કરાવવા મામલતદાર કચેરીમાં અરજી કરી હતી. જેમાંમૂળ માલિક વલ્લભભાઈ ઝવેરભાઈના નામની 135 ડી મુજબ નોટિસ ઈશ્યૂ કરાઈ હતી. જે નોટિસ મળ્યા બદલની પાવતી સ્વરૂપે રજૂ થયેલ દસ્તાવેજમાં મિલકતના માલિક વલ્લભભાઈ ઝવેરભાઈનું નામ લખેલું હતું. તે નામ પર લીટો મારી તેની નીચે ભૂપેન્દ્રભાઈ ડાભીએ સહી કરી હતી.

વલ્લભભાઈ ઝવેરભાઈને નોટિસ બજેલ ન હોવા છતાં ફેરફાર નોંધ પાડી તેના આધારે વલ્લભભાઈ ઝવેરભાઈનું નામ રેકર્ડ ઉપરથી દૂર કરી આરોપી ભૂપેન્દ્રભાઈ ડાભીએ માલિકી હકે પોતાનું નામ દાખલ કરાવી દીધું હતુ. આ હકીકત જે તે સમયના નાયબ મામલતદાર બી.એન.શર્માના ધ્યાને આવતા ખોટો વેચાણ દસ્તાવેજ થયો હોવાનું ખુલવા પામતા તેઓએ મહેમદાવાદ પોલીસ સ્ટેશને તમામ આરોપીઓ સામે 2012 માં લેખિત ફરિયાદ આપી હતી.

આ અંગે કોર્ટમાં 20 મૌખિત અને 69 દસ્તાવેજી પુરાવા રજૂ કરવામાં આવ્યા હતા. સરકારી વકીલ દ્વારા કરવામાં આવેલી દલીલને ધ્યાનમાં લઈ કોર્ટે આરોપીઓને સજા સંભળાવી હતી. વલ્લભભાઈ ઝવેરભાઈ પટેલનું નામ ધારણ કરનારા હિરાભાઈ કલાભાઈ ડાભી ટ્રાયલ દરમિયાન અવસાન પામ્યા હતા. કોર્ટે બાકીના આરોપીઓને પાંચ વર્ષની સજા સહિત એક-એક હજારનો દંડ પણ કર્યો હતો.

આ પણ વાંચો:  બગસરા બાદ બનાસકાંઠામાં બાળકોએ હાથ પર બ્લેડથી કાપા માર્યા