અમદાવાદ: રાજ્યમાં કમોસમી વરસાદના વિરામ બાદ હવે ધીમે ધીમે શિયાળાએ દસ્તક દીધી છે. હવામાન વિભાગના અહેવાલ મુજબ, છેલ્લા ૨૪ કલાક દરમિયાન સમગ્ર ગુજરાત પ્રદેશ, સૌરાષ્ટ્ર-કચ્છ તેમજ દીવ, દમણ અને દાદરા નગર હવેલીમાં હવામાન સંપૂર્ણપણે સૂકું રહ્યું હતું. હવામાન વિભાગે આગામી સાત દિવસ સુધી પણ રાજ્યભરમાં હવામાન સૂકું રહેવાની આગાહી કરી છે, જેનાથી લોકોને માવઠાની ચિંતામાંથી રાહત મળશે.
કચ્છમાં તાપમાનમાં મોટો ઘટાડો, ઉત્તર ગુજરાતમાં ગરમી યથાવત્
બુધવારે રાત્રિના તાપમાનમાં મોટો ફેરફાર જોવા મળ્યો છે. ખાસ કરીને કચ્છના ભાગોમાં રાત્રિના તાપમાનમાં નોંધપાત્ર ઘટાડો થયો છે, જેના કારણે ઠંડીનું પ્રમાણ વધ્યું છે. રાજ્યમાં સૌથી ઓછું લઘુત્તમ તાપમાન ૧૫ ડિગ્રી સેલ્સિયસ નલિયા ખાતે નોંધાયું હતું, જેણે નલિયાને રાજ્યનું સૌથી ઠંડું સ્થળ બનાવ્યું છે. કચ્છના કેટલાક ભાગોમાં તાપમાન સામાન્ય કરતાં ઓછું રહ્યું હતું, જ્યારે ઉત્તર ગુજરાતના ભાગોમાં રાત્રિનું તાપમાન હજુ પણ સામાન્ય કરતાં વધુ નોંધાયું હતું.
મુખ્ય શહેરોમાં તાપમાનની સ્થિતિ
છેલ્લા ૨૪ કલાક દરમિયાન રાજ્યના તાપમાનમાં નોંધપાત્ર ફેરફાર જોવા મળ્યો છે, જેમાં સરેરાશ મહત્તમ તાપમાન ૩૧.૮ ડિગ્રી સેલ્સિયસ અને સરેરાશ લઘુત્તમ તાપમાન ૨૧.૧ ડિગ્રી સેલ્સિયસ નોંધાયું હતું. ઠંડીના પ્રારંભ રૂપે નલિયા ૧૫ ડિગ્રી સેલ્સિયસ લઘુત્તમ તાપમાન સાથે રાજ્યનું સૌથી ઠંડું સ્થળ રહ્યું હતું, જ્યારે ભાવનગરમાં પણ તાપમાન ઘટીને ૧૮ ડિગ્રી સેલ્સિયસ નોંધાયું હતું.
દિવસ દરમિયાન સૌથી વધુ ગરમી ભુજમાં ૩૫ ડિગ્રી સેલ્સિયસ નોંધાઈ હતી, જ્યારે રાજકોટમાં ૩૪ ડિગ્રી સેલ્સિયસ, ડીસા ૩૪ ડિગ્રી સેલ્સિયસ, અને અમરેલી ૩૩ ડિગ્રી સેલ્સિયસ પણ ગરમીનો અહેસાસ થયો હતો. રાજ્યના અન્ય મુખ્ય શહેરો જેમ કે અમદાવાદ મહત્તમ ૩૨ ડિગ્રી સેલ્સિયસ અને લઘુત્તમ ૨૧ ડિગ્રી સેલ્સિયસ, વડોદરા મહત્તમ ૩૧ ડિગ્રી સેલ્સિયસ અને ૨૦ ડિગ્રી સેલ્સિયસ, અને સુરતમાં મહત્તમ ૩૧ ડિગ્રી સેલ્સિયસ અને લઘુત્તમ ૨૧ ડિગ્રી સેલ્સિયસ તાપમાન સામાન્ય રહ્યું હતું.
આ પણ વાંચો…હવે ઠંડીની તૈયારી! ગુજરાતના તાપમાનમાં મોટો તફાવત, અમરેલી સૌથી ઠંડું
