ગાંધીનગર મહાનગરપાલિકાનો મોટો નિર્ણય: ₹156.86 કરોડના ખર્ચે પંચેશ્વર-કોબા રોડ ડેવલપમેન્ટને મંજૂરી

અમદાવાદઃ કોમનવેલ્થ ગેમ્સ 2030ની યજમાની ગુજરાતને મળી તેની સત્તાવાર રીત જાહેરાત કરી દેવામાં આવી હતી. તેની તૈયારીના ભાગરૂપે ગાંધીનગર મહાનગરપાલિકાએ પણ તડામાર તૈયારીઓ શરૂ કરી દીધી છે. અમદાવાદ અને ગાંધીનગરમાં કોમનવેલ્થ ગેમ્સના ભવ્ય આયોજનની તૈયારી કરવામાં આવી રહી છે. ગાંધીનગર મહાનગરપાલિકા પંચેશ્વર સર્કલથી કોબા સર્કલ રોડને વિકસાવવા માટે 157 કરોડ રૂપિયાના ખર્ચે કામગીરી શરૂ કરવામાં આવી છે.

ગાંધીનગર મ્યુનિસિપલ કોર્પોરેશને પંચેશ્વર સર્કલથી કોબા સર્કલ રોડ ડેવલપમેન્ટની કામગીરી માટે હાથ ધરી છે. જેમાં કરોડોના ખર્ચ સાથે ટેન્ડર પ્રક્રિયા હાથ ધરવામાં આવી હતી. આમાં 4.70 ટકા ઊંચા ભાવ ભરનારી એજન્સીને રૂપિયા 156.86 કરોડના ખર્ચ સાથે આ કામગીરી સોંપવામાં આવશે.

શનિવારે યોજાયેલી સ્થાયી સમિતીની બેઠકમાં આ નિર્ણય લેવામાં આવશે. અગાઉ ધોળાકુવા જંક્શનથી પંચેશ્વર સર્કલ સુધી ડેવલપમેન્ટ કરવા નિર્ણય લેવાયો હતો. આ કામગીરી માટે કન્સલટન્ટ તરીકે પસંદ થયેલી એજન્સીને પ્રોજેક્ટ કોસ્ટનાં 1.50 ટકા લેખે ચૂકવણી કરવામાં આવશે. આમ કોમનવેલ્થ ગેમ્સ પહેલા ધોળાકુવાથી કોબા સર્કલ સુધીનો સમગ્ર વિસ્તાર આઈકોનિક રોડને ટક્કર મારે તેવી અદ્યતન સુવિધાઓ અને ટેકનોલોજીથી સજ્જ કરવામાં આવશે. તેવું પણ સૂત્રો દ્વારા જાણવા મળ્યું છે.

ન્યૂ ગાંધીનગરમાં પણ વિકાસના કાર્યો શરૂ કરવામાં આવ્યાં છે. સૂત્રો દ્વારા મળતી જાણકારી પ્રમાણે રોડ-રસ્તા માટે રૂપિયા 77 કરોડથી વધુનો ખર્ચ કરવામાં આવશે. કુડાસણ, રાયસણ, રાંદેસણ, સરગાસણ, કોબા નભોઈ, પોર અને અંબાપુર ગામના ટીપી વિસ્તારોમાં નવા રોડ બનાવવા તથા જૂના રોડ-રસ્તાના રીસરફેસિંગ માટે રૂપિયા 73 કરોડનો ખર્ચ કરવામાં આવશે. આ સાથે પાલજ અને બાસણમાં આરસીસી રોડ બનાવવા રૂપિયા 4.30 કરોડના ટેન્ડરને પણ મંજૂરી આપવામાં આવશે, તેવું સૂત્રોએ જણાવ્યું હતું.

આ પણ વાંચો…..અમદાવાદમાં કોમનવેલ્થ ગેમ્સની તૈયારીઓ શરુ, નરેન્દ્ર મોદી સ્ટેડિયમ નજીક ડિમોલિશન કરાયું