અમદાવાદ: લાંબા સમયથી જેણે ગુજરાતના રાજકારણમાં રાજકીય ગરમાવો સર્જ્યો હતો તે વિસાવદર અને કડી વિધાનસભા બેઠકની પેટા ચૂંટણી માટે મતદાન યોજાયું હતું. વિસાવદર અને કડી વિધાનસભા મતવિસ્તારોમાં ગુરુવારે સાંજે 6 વાગ્યા સુધીમાં સરેરાશ 55 ટકાથી વધુ મતદાન નોંધાયું હતું. ચૂંટણી પંચના અધિકારીઓએ જણાવ્યું હતું કે સવારે 7 વાગ્યે શરૂ થયેલું મતદાન સાંજે 6 વાગ્યે શાંતિપૂર્ણ રીતે પૂર્ણ થયું હતું. ચૂંટણી પંચ દ્વારા શેર કરાયેલા આંકડા અનુસાર, જૂનાગઢ જિલ્લાની વિસાવદર બેઠક અને મહેસાણા જિલ્લાની કડી બેઠક પર સાંજે 6 વાગ્યા સુધી અનુક્રમે 56.89 ટકા અને 57.90 ટકા મતદાન થયું હતું.
સવારે મતદાન શરૂ થતાં જ મતદાન મથકો પર લોકો કતારમાં ઉભા રહી ગયા હતા. વિસાવદરમાં, ભાજપ અને કોંગ્રેસના ઉમેદવારો મતદાન કરનારાઓમાં સૌથી પહેલા હતા. દરેક મતવિસ્તારના 294 મતદાન મથકો પર ઇલેક્ટ્રોનિક વોટિંગ મશીન (ઈવીએમ) દ્વારા મતદાન કરવામાં આવ્યું હતું. ચૂંટણી પંચના અધિકારીઓએ જણાવ્યું હતું કે મતદાન પ્રક્રિયા મોટાભાગે શાંતિપૂર્ણ રહી હોવાથી મતદાનમાં વિક્ષેપ પાડતી બે બેઠકો પર કોઈ અનિચ્છનીય ઘટના નોંધાઈ નથી. રાજ્ય સરકારે મતદાન માટે ગુરુવારે બંને મતવિસ્તારમાં જાહેર રજા જાહેર કરી હતી. ભાજપ, કોંગ્રેસ અને આમ આદમી પાર્ટી (આપ) એ આ બંને બેઠકો પર પોતાના ઉમેદવારો ઉભા રાખ્યા હતા.
2023થી ખાલી પડી હતી વિસાવદર બેઠક
ઉલ્લેખનીય છે કે ડિસેમ્બર 2023માં તત્કાલીન આમ આદમી પાર્ટીના ધારાસભ્ય ભૂપત ભાયાણી રાજીનામું આપીને ભાજપમાં જોડાયા ત્યારથી વિસાવદર બેઠક ખાલી પડી હતી. વિસાવદરની પેટાચૂંટણી માટે ભાજપે કિરીટ પટેલને ચૂંટણીના મેદાનમાં ઉતાર્યા હતા, જ્યારે કોંગ્રેસે નીતિન રાણપરિયાને તથા આપે પૂર્વ ગુજરાત પ્રમુખ ગોપાલ ઇટાલિયા પર પસંદગીનો કળશ ઢોળ્યો હતો. રાજ્યમાં લગભગ સંપૂર્ણ પ્રભુત્વ હોવા છતાં, ભાજપ 2007થી વિસાવદર બેઠક જીતી શક્યું ન હતું. પાર્ટીના નેતાઓએ કહ્યું હતું કે તેઓ અહીં 18 વર્ષની નિષ્ફળતાને દૂર કરવાની આશા વ્યક્ત કરી હતી.
2022ની વિધાનસભા ચૂંટણીમાં, આપના ભૂપત ભાયાણીએ કોંગ્રેસમાંથી ભાજપમાં જોડાયેલા પૂર્વ ધારાસભ્ય હર્ષદ રિબડિયાને 7,063 મતોથી હરાવ્યા હતા. મહેસાણા જિલ્લાની કડી બેઠક અનુસૂચિત જાતિ (એસસી) ઉમેદવારો માટે અનામત છે અને ભાજપના ધારાસભ્ય કરસન સોલંકીના અવસાન બાદ 4 ફેબ્રુઆરીથી ખાલી પડી છે. ભાજપે કડી બેઠક પરથી રાજેન્દ્ર ચાવડાને મેદાનમાં ઉતાર્યા હતા, જ્યારે પૂર્વ ધારાસભ્ય રમેશ ચાવડા કોંગ્રેસ તરફથી મેદાનમાં હતા. રમેશ ચાવડાએ 2012 માં આ બેઠક જીતી હતી, પરંતુ 2017 ની ચૂંટણીમાં તેઓ ભાજપના કરસન સોલંકી સામે હારી ગયા હતા. વિસાવદરની જેમ, કડી બેઠક પર પણ ત્રિકોણીય મુકાબલો થયો હતો, જેમાં અરવિંદ કેજરીવાલના નેતૃત્વ હેઠળના આપએ જગદીશ ચાવડાને મેદાનમાં ઉતાર્યા હતા.
૨૩ જૂનના રોજ મતગણતરી
182 સભ્યોની ગુજરાત વિધાનસભામાં, ભાજપ પાસે 161 ધારાસભ્યો છે, કોંગ્રેસ પાસે 12 અને આપ પાસે ચાર ધારાસભ્ય છે. એક બેઠક સમાજવાદી પાર્ટી પાસે છે, જ્યારે બે બેઠકો અપક્ષ ઉમેદવારો પાસે છે. આ ચૂંટણી માટે મતગણતરી ૨૩ જૂનના સવારથી શરૂ થશે અને તે જ દિવસે બપોર સુધીમાં પરિણામો જાહેર થઈ જશે.
આ પણ વાંચો…ગુજરાતમાં ફરી ચૂંટણીનો માહોલ: વિસાવદર અને કડી બેઠક પર પેટાચૂંટણીની જાહેરાત; જાણો સંપૂર્ણ કાર્યક્રમ
