ખેડબ્રહ્માના 17 વર્ષના યુવાનના અંગોનું દાન ત્રણ જીવનના પુરશે રંગ; અમદાવાદ સિવિલમાં ત્રણ અંગોનું દાન…
અમદાવાદ: વિશ્વ લીવર દિવસે જ અમદાવાદ સિવિલ હોસ્પિટલમાં લીવર સહિત કુલ ત્રણ અંગો અને આંખોનું દાન મળ્યું હતું. ખેડબ્રહ્માના 17 વર્ષના યુવાન મનુભાઇ ઓડિયાનો માર્ગ અકસ્માત થયો હતો અને તેનું સારવારના અંતે બ્રેઇન ડેડ જાહેર થતાં સ્વજનોએ કર્યું અંગદાન કર્યું હતું. સિવિલ હોસ્પિટલમાં અત્યાર સુધીમાં ૧૬૪ લીવરનું દાન મળ્યું છે.
૧૭ વર્ષીય યુવકનો થયો હતો માર્ગ અકસ્માત
મળતી વિગતો અનુસાર સાબરકાંઠા જિલ્લાના ખેડબ્રહ્માના ૧૭ વર્ષના યુવાન મનુભાઇ ઇન્દ્રેશભાઇ ઓડીયાને ૧૨ એપ્રિલના રોજ રાત્રે માર્ગ અકસ્માતમાં માથાના ભાગે ગંભીર ઇજા પહોંચી હતી. આથી પ્રથમ ખેડબ્રહ્મા સિવિલ હોસ્પિટલ ત્યારબાદ હિંમતનગર સિવિલ હોસ્પિટલ અને ત્યારપછી વધુ સારવાર અર્થે સિવિલ હોસ્પિટલ અમદાવાદમાં ૧૬ એપ્રિલના રોજ લાવવામાં આવ્યા હતા.
પરિવારે અંગદાન કરવાનો કર્યો નિર્ણય
સિવિલ હોસ્પિટલમાં સારવાર દરમિયાન તા. ૧૯ એપ્રિલના રોજ ડૉક્ટરોએ મનુભાઇને બ્રેઈન ડેડ જાહેર કર્યા હતા. મનુભાઇના પિતા ઇંદ્રેશભાઇ તેમજ તેમના દાદાએ ખુબ વિચારના અંતે આવી પરીસ્થિતિમાં મનુભાઇના અંગોનુ દાન કરી બીજાના શરીરમાં મનુભાઇ જીવીત રહેશે એમ સમજી બીજા લોકોની જિંદગી બચાવવા માટે અંગદાન કરવાનો નિર્ણય કર્યો હતો.
કુલ ત્રણ લોકોની જીંદગી બચાવી શકાશે
તેમણે આગળ કહ્યું હતું કે મનુભાઇના અંગદાનથી મળેલ બે કીડની, એક લીવર ને સિવિલ મેડીસીટી કેમ્પસની જ કીડની હોસ્પિટલના જરુરીયાતમંદ દર્દીઓમાં પ્રત્યારોપણ કરવામાં આવશે. તેમજ બે આંખોનુ દાન સિવિલ મેડીસીટી કેમ્પસની જ એમ એન્ડ જે આંખની હોસ્પિટલ દ્વારા સ્વીકારવામાં આવ્યુ હતું. આમ આ અંગદાનથી કુલ ત્રણ લોકોની જીંદગી બચાવી શકાશે તેમ સિવિલ હોસ્પિટલ સુપ્રીટેન્ડન્ટ ડૉ.રાકેશ જોષીએ જણાવ્યુ હતુ.
કુલ 188 અંગદાતાઓ કર્યું છે અંગદાન
સિવિલ હોસ્પિટલ દ્વારા અત્યાર સુધીમાં કુલ 188 અંગદાતાઓ થકી કુલ 615 અંગોનું દાન મળેલ છે. જેમાં 164 લીવર, 342 કીડની, 11 સ્વાદુપિંડ, 60 હ્રદય, 30 ફેફસા, 6 હાથ, 2 નાના અંતરડા અને 10 ચામડીનો સમાવેશ થાય છે. આ 188 અંગદાતા ઓ થકી 597 વ્યકિતઓને જીવનદાન મળ્યુ છે.
આપણ વાંચો : Organ Donation: અમદાવાદમાં એક શ્રમિકના અંગદાનથી ચાર લોકોને મળ્યું નવું જીવન