અમદાવાદઃ ગુજરાતમાંથી ચોમાસું વિદાય લઈ રહ્યું છે. જોકે વિદાય ટાણે પણ મેઘરાજા કેટલાક વિસ્તારોમાં મન મૂકીને વરસી રહ્યા છે. રાજ્યમાં છેલ્લા બે દિવસમાં પડેલા ભારે વરસાદના કારણે તમામ ઝોનમાં 100 ટકાથી વધુ વરસાદ વરસ્યો છે. આ ઉપરાંત રાજ્યની જીવાદોરી સમાન નર્મદા ડેમ પણ છલકાવાની તૈયારીમાં છે. માછીમારોને 2 ઓક્ટોબર સુધી દરિયો નહીં ખેડવાની સલાહ આપવામાં આવી છે.
તમામ ઝોનમાં 100 ટકાથી વધુ વરસાદ
સ્ટેટ ઈમરજન્સી ઓપરેશન સેન્ટરના આંકડા પ્રમાણે, રાજ્યમાં સિઝનનો સરેરાશ 115.10 ટકા વરસાદ વરસ્યો છે. કચ્છમાં સૌથી વધુ 140. 23 ટકા, ઉત્તર ગુજરાતમાં 120.19 ટકા, પૂર્વ મધ્યમાં 115.57 ટકા, સૌરાષ્ટ્રમાં 101.96 ટકા, દક્ષિણ ગુજરાતમાં 121.72 ટકા વરસાદ વરસ્યો છે.
નર્મદા ડેમ પણ 97.23 ટકા ભરાયેલો છે. રાજ્યના અન્ય 206 જળાશયોમાં 95.10 ટકા જળસંગ્રહ છે. રાજ્યમાં 146 ડેમ હાઈ એલર્ટ છે, 17 ડેમ એલર્ટ અને 14 ડેમ વોર્નિંગ પર છે. જ્યારે 109 ડેમ સો ટકા ભરાયેલા છે. 68 ડેમ 70 થી 100 ટકા વચ્ચે ભરાયેલા છે. જ્યારે 11 ડેમમાં 50 થી 70 ટકા વચ્ચે જળસંગ્રહ છે. 9 ડેમમાં 25 ટકાથી ઓછા ભરાયેલા છે. રાજ્યમાં 145 રોડ રસ્તા હજુ પણ બંધ છે.
સવારથી 36 તાલુકામાં વરસાદ
રાજ્યમાં આજે સવારે 6 થી 10 કલાકમાં 36 તાલુકામાં વરસાદ નોંધાયો હતો. જૂનાગઢના માંગરોળમાં સૌથી વધુ 3.82 ઇંચ, માળીયા હાટીનામાં 1.77 ઇંચ, કેશોદમાં 1.73 ઇંચ, ઉનામાં 1.69 ઇંચ, તાલાલામાં 1.61 ઇંચ, પાટણ વેરાવળમાં 1.50 ઇંચ, સૂત્રાપાડામાં 1.18 ઇંચ, કોડીનારમાં 1.02 ઇંચ અને ગીર ગઢડામાં 0.75 ઇંચ વરસાદ વરસ્યો હતો.
હવામાન વિભાગની આગાહી
રાજ્યના અનેક જિલ્લામાં આજે ગાજવીજ સાથે હળવાથી મધ્યમ વરસાદ પાડવાની આગાહી કરવામાં આવી છે. તો ખાસ કરીને દક્ષિણ ગુજરાત માટે ભારેથી અતિ ભારે વરસાદની આગાહી કરવામાં આવી છે. રાજ્યના હવામાન વિભાગ દ્વારા કરવામાં આવેલી આગાહી અનુસાર, સુરત, નવસારી અને વલસાડમાં અમુક સ્થળોએ ભારેથી ભારે વરસાદ સાથે અમુક અલગ-અલગ સ્થળોએ અત્યંત ભારે વરસાદ પાડવાની સંભાવના છે. છોટા ઉદેપુર, નર્મદા, ભરૂચ, ડાંગ, તાપી અને દમણ, દાદરા અને નગર હવેલીમાં અમુક સ્થળોએ ભારેથી અતિ ભારે વરસાદ થવાની સંભાવના છે. સૌરાષ્ટ્ર-કચ્છના જિલ્લાઓમાં અમરેલી અને ભાવનગરમાં પણ અમુક સ્થળોએ ભારેથી અતિ ભારે વરસાદ થવાની સંભાવના છે.
તે ઉપરાંત બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, મહીસાગર અને વડોદરામાં અમુક સ્થળોએ ભારે વરસાદ થવાની સંભાવના છે. જ્યારે સુરેન્દ્રનગર, રાજકોટ, જૂનાગઢ, ગીર સોમનાથ, બોટાદ અને દીવમાં પણ અમુક સ્થળોએ ભારે વરસાદ થવાની સંભાવના છે. સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, મહીસાગર, વડોદરા, છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી અને દમણ, દાદરા અને નગર હવેલી, રાજકોટ, જૂનાગઢ, અમરેલી, ભાવનગર, ગીર સોમનાથ, બોટાદ અને દીવમાં 40થી 50 પ્રતિ કિમીની ઝડપે પવન ફૂંકાઈ શકે છે.
આપણ વાંચો: રાજ્યમાં આસોમાં જામ્યો અષાઢી માહોલ, સૂત્રાપાડામાં 8 ઇંચ વરસાદ, જાણો 24 કલાકના આંકડા
