(અમારા પ્રતિનિધિ તરફથી)
અમદાવાદઃ ગુજરાતમાં મેડિકલ કોલેજોમાં અનુસ્નાતક કક્ષાના કોર્સની બેઠક ખાલી પડી છે અને તેને ભરવા માટે હવે ત્રીજો રાઉન્ડ શરૂ થવાનો છે. આ માટે ગુજરાતની મેડિકલ કોર્સ માટેની એડમિશન કમિટીએ પાત્રતા માટેના પર્સન્ટાઈલમાં ઘટાડાની જાહેરાત કરી છે. બે રાઉન્ડ બાદ પણ બેઠકો ખાલી રહેતા હવે ત્રીજા રાઉન્ડની શરૂઆત કમિટી કરશે, તેવી માહિતી સૂત્રોએ આપી હતી.
મંગળવારે કમિટીએ જાહેરાત કરી હતી કે જનરલ કેટેગરીમાં 7 પર્સેન્ટાઈલ, વિકલાંગ વ્યક્તિઓમાં 5 પર્સેન્ટાઈલ અને અનામત શ્રેણીના વિદ્યાર્થીઓ માટે શૂન્ય પર્સેન્ટાઈલ (માઈનસ 40 ગુણ) ધરાવતા અરજદારોને બુધવારે જાહેર થનારા ત્રીજા રાઉન્ડમાં લાયક ગણવામાં આવશે.
એમડી-એમએસ જેવા અભ્યાસક્રમોમાં નીટના આધારે પીજી પ્રવેશ ફાળવવામાં આવે છે. પ્રવેશ માટે નોંધણી માટે, જનરલ કેટેગરીના વિદ્યાર્થીઓ માટે 50 પર્સેન્ટાઈલ, વિકલાંગ માટે 45 અને અનામત શ્રેણીના વિદ્યાર્થીઓ માટે 40 પર્સેન્ટાઈલ ફરજિયાત બનાવવામાં આવ્યા હતા. આ પર્સેન્ટાઈલ સાથે, પ્રવેશ સમિતિ દ્વારા બે રાઉન્ડ પૂર્ણ કરવામાં આવ્યા છે, તેમ અધિકારીએ જણાવ્યું હતું.
બે રાઉન્ડ પછી, દેશભરના વિવિધ રાજ્યોમાં 20,000 થી વધુ પીજી મેડિકલ બેઠક ખાલી છે. ગુજરાતમાં, 642 બેઠક ખાલી છે, જેમાં 163 બેઠક મળ્યા બાદ વિદ્યાર્થીઓના નોન-રિપોર્ટિંગને કારણે, 13 વિદ્યાર્થીઓએ પ્રવેશ પછી કન્ફર્મ ન કર્યું હોવાથી, 112 નવી મંજૂર થયેલી બેઠકો અને 354 નોન-કન્વર્ઝનને કારણે ખાલી રહેલી બેઠકનો સમાવેશ થાય છે.
