અમદાવાદમાં બંધ ફ્લેટમાંથી કેવી રીતે પકડાયો ગુજરાતના ઈતિહાસનો સૌથી મોટો સોનાનો જથ્થો? જાણો વિગત

Latest Ahmedabad News: અમદાવાદ(Ahmedabad) શહેરના પાલડી વિસ્તારમાં શેરબજાર ઓપરેટરના બંધ હાલતમાં રહેલા ફ્લેટ પર ગુજરાત એટીએસ અને ડીઆરઆઈએ બાતમીને આધારે દરોડા પાડ્યા હતાં. આ ફ્લેટમાંથી 95.5 કિલો સોનું અને 60 લાખ રોકડ ઝડપાઈ હતી. તપાસ એજન્સીઓએ સોનું અને રોકડ જપ્ત કરીને વધુ તપાસ હાથ ધરી હતી.

આ રીતે પકડાયો સૌથી મોટો સોનાનો જથ્થો
ડીઆરઆઈને જાણવા મળ્યું કે, કેટલીક વ્યક્તિઓ ફ્લેટ બંધ હોવા છતાં લગભગ રોજ બેગો લઈને અવર જવત કરતા હતા. ડીઆરઆઈના અધિકારીઓ ફેરિયાના સ્વાંગમાં ફ્લેટમાં થતી અવર જવર પર નજર રાખતા હતા. કયા સમયે કોણ કોણ આવે છે અને કયા વાહનમાં આવે છે તેની પણ નોંધ રાખવામાં આવતી હતી. ગુપ્ત રાહે તપાસમાં જાણવા મળ્યું કે, કરોડોનો આસામી હોવા છતાં પાલડીમાં ફલેટ ભાડે રાખ્યો હતો. આ ફ્લેટનીચાવી એક વકીલ પાસે રહેતી હતી. જેથી તેને બોલાવી ફ્લેટ ખોલાવવામાં આવ્યો હતો. બંધ ફ્લેટમાં લોકોની શંકાસ્પદ અવરજવર થતી હોવાની પાક્કી બાતમીન આધારે રેડ પાડવામાં આવી હતી.

સોનાની તમામ લગડી ઈમ્પોર્ટેડ
અમદાવાદના પાલડી વિસ્તારમાં શેરબજાર ઓપરેટરના આવિષ્કાર એપાર્ટમેન્ટના ફ્લેટ નંબર 104માં 100 કિલો સોનું છુપાવી રાખવામાં આવ્યું હોવાની બાતમી મળતાં એટીએસ અને ડીઆરઆઈના અધિકારીઓએ દરોડા પાડ્યા હતા. જ્યાંથી 95.5 કિલો સોનું ઝડપાયું હતું. તે ઉપરાંત 60 લાખની રોકડ પણ જપ્ત કરાઈ હતી. ફલેટમાંથી પકડાયેલી સોનાની તમામ લગડી ઈમ્પોર્ટેડ છે.

આ પણ વાંચો…અમદાવાદની કેડિલા ફાર્માસ્યુટીકલ્સમાં દુર્ઘટના બની, ત્રણથી વધુ મહિલાકર્મી વોશરુમમાં થઇ બેભાન, એકનું મોત

જપ્ત કરાયેલું મોટાભાગનું સોનું છેલ્લા એક વર્ષમાં જ ખરીદવામાં આવ્યું હતું
અમદાવાદમાંથી પકડાયેલા આ મુદ્દામાલનું કનેકશન મુંબઈ સુધી લંબાયું છે. મૂળ અમદાવાદનો અને મુંબઈમાં રહેતો અને ડબ્બા ટ્રેડીંગ સાથે સંકળાયેલા મેઘ શાહે ડબ્બા ટ્રેડીંગના માધ્યમથી મેળવેલા નાણાંમાંથી સોનું ખરીદીને સંતાડવા માટે અમદાવાદમાં ફ્લેટ ભાડે રાખ્યો હતો. મહેન્દ્ર શાહ અને મેઘ શાહે આ ફ્લેટ ક્યારે ભાડે રાખ્યો અને કેટલા સમયમાં ક્યાંથી કેટલું સોનું અને રોકડની હેરાફેરી કરી છે તેની વિગતો જાણવાની હજુ બાકી છે. સૂત્રોના જણાવ્યા અનુસાર, જપ્ત કરાયેલું મોટાભાગનું સોનું છેલ્લા એક વર્ષમાં જ ખરીદવામાં આવ્યું હતું. ફ્લેટમાં એક તિજોરીમાંથી કરોડોના વ્યવહારોની કાચી એન્ટ્રીઓ પણ મળી હતી.

આ ઉપરાંત ​​​​​​​પિતા-પુત્રની જોડી કાળા નાણાં ધોળા કરવા માટે ચોક્કસ કમિશન પર કામ કરતા હોવાની શંકા છે. તપાસમાં કેટલાક મોટા નામો પણ બહાર આવી શકે છે. પિતા-પુત્ર મની લોન્ડરિંગમાં પણ સંડોવાયા હોવાની શંકા છે. તપાસ દરમિયાન બીજા અનેક મોટા ખુલાસા થઈ શકે છે.