‘દારૂ-ડ્રગ્સના મામલે જો ગંભીર હો તો…’ ગોપાલ ઈટાલીયાએ હર્ષ સંઘવીને પત્ર લખી ફેંક્યો પડકાર

અમદાવાદ: કોંગ્રેસ નેતા જીગ્નેશ મેવાણીના પોલીસના પટ્ટા ઉતરવાના નિવેદન પર ભારે ઘમાસાણ મચી ગયું છે. ત્યારે આમ આદમી પાર્ટીએ કોંગ્રેસ નેતા જીગ્નેશ મેવાણીના નિવેદનનું સમર્થન કર્યું હતું. આમ આદમી પાર્ટીના નેતા અને વિસાવદરના ધારાસભ્ય ગોપાલ ઇટાલિયાએ સોશિયલ મીડિયા પર વીડિયો શેર કરીને નાયબ મુખ્ય પ્રધાન હર્ષ સંઘવી પર 2014ની લોકસભા ચૂંટણીના પ્રચાર સમયે પોલીસ સાથે દુર્વ્યવહાર મામલે નોંધાયેલી ફરિયાદનો ઉલ્લેખ કરીને આકરા પ્રહાર કર્યા હતા. ત્યારે હવે ગોપાલ ઇટાલિયાએ ગૃહ પ્રધાનને પત્ર લખ્યો છે.

આમ આદમી પાર્ટીના ધારાસભ્ય ગોપાલ ઈટાલીયાએ ગુજરાતમાં વકરી રહેલા દારૂ અને ડ્રગ્સના દૂષણને લઈને રાજ્ય સરકાર પર પ્રહાર કર્યા છે. આ ગંભીર સમસ્યાના મૂળમાંથી નિરાકરણ લાવવા માટે તેમણે સીધા ગૃહ પ્રધાન હર્ષ સંઘવીને એક પત્ર લખીને તાત્કાલિક ધોરણે સર્વપક્ષીય બેઠક બોલાવવાની માંગ કરી છે. ઈટાલીયાએ સ્પષ્ટપણે જણાવ્યું છે કે રાજ્યમાં બેફામ દારૂ વેચાય છે અને ડ્રગ્સનું દૂષણ પણ ચિંતાજનક સ્તરે પહોંચી ગયું છે, જેના કારણે રાજ્યની જનતામાં મોટી ચિંતા પ્રસરી છે.

વિસાવદરના ધારાસભ્ય ગોપાલ ઈટાલીયાએ પોતાના પત્રમાં લખ્યું છે કે, “રાજકીય ટીકા-ટીપ્પણી અને આક્ષેપબાજીઓ ચાલતી જ રહેવાની છે, પરંતુ જો ગુજરાત સરકાર અને ગૃહ પ્રધાન પોતે દારૂ-ડ્રગ્સના દૂષણ બાબતે ગંભીર હોય, તો આ અત્યંત જરૂરી બાબત પર વિસ્તૃત ચર્ચા કરવી જોઈએ.” તેમણે ભારપૂર્વક જણાવ્યું કે, આ દૂષણ સદંતર નેસ્તનાબૂદ થાય તે માટે અસરકારક પગલાં લેવા અંગે વિચારણા કરવા માટે તમામ રાજકીય પક્ષોના ડેલિગેશનની સર્વપક્ષીય મીટિંગ બોલાવવી ખૂબ જ જરૂરી છે.

ગોપાલ ઈટાલીયાએ ગૃહ પ્રધાન હર્ષ સંઘવીને રજૂઆત કરી છે કે, તેમની અધ્યક્ષતામાં તાત્કાલિક ધોરણે આ સર્વપક્ષીય બેઠકનું આયોજન કરવામાં આવે. આ બેઠકમાં તમામ પક્ષોના પ્રતિનિધિઓ સાથે મળીને દારૂબંધીને વધુ કડક બનાવવા અને ડ્રગ્સની હેરાફેરી અટકાવવા માટેના પગલાંઓ પર વિગતવાર ચર્ચા કરી શકે. આ પત્ર દ્વારા ઈટાલીયાએ સરકારને આ મુદ્દે રાજનીતિથી ઉપર ઉઠીને જનહિતમાં નક્કર પગલાં લેવા માટે હાકલ કરી છે અને ગૃહમંત્રીના સકારાત્મક પ્રતિભાવની રાહ જોવાની વાત કરી છે.

આપણ વાંચો:  પોલીસના પટ્ટા ઉતારવાના વિવાદ વચ્ચે નર્મદામાં AAPના જિલ્લા પ્રમુખનો ભાઈ દારૂ વેચતા ઝડપાયાનો દાવો