જાણો! વસ્ત્રાપુર લેકમાં કેટલી હશે એન્ટ્રી ફી અને તમારા પાલતુ પ્રાણીઓ માટે શું છે નવી વ્યવસ્થા?

અમદાવાદઃ શહેરનું જાણીતું વસ્ત્રાપુર તળાવ બ્યુટિફિકેશનની કામગીરી બાદ ફરી એકવાર લોકો માટે ખુલ્લું મૂકવામાં આવશે. અમદાવાદ મ્યુનિસિપલ કોર્પોરેશન (AMC) દ્વારા રિડેવલપમેન્ટનું કામ પૂર્ણ થઈ ગયું હોવાથી, આ રમણીય સ્થળનું ઉદ્ઘાટન કેન્દ્રીય ગૃહ પ્રધાન અમિત શાહ દ્વારા ડિસેમ્બરના પહેલા અઠવાડિયામાં થવાની શક્યતા છે. AMCએ તળાવમાં પ્રવેશવા પ્રવેશ ફી લાગુ કરી છે, જે 1 જાન્યુઆરી, 2026થી અમલમાં આવશે. સામાન્ય પ્રવેશ ફી વ્યક્તિ દીઠ ₹ 10 નક્કી કરવામાં આવી છે, જ્યારે પાંચથી બાર વર્ષની વયના બાળકો માટે ₹5 ફી લેવામાં આવશે.

સવારે 6 વાગ્યાથી સવારે 10 વાગ્યા સુધી પ્રવેશ મફત રહેશે. ₹10 ની ફી બે પેઇડ સ્લોટ સવારે 10 વાગ્યાથી બપોરે 12 વાગ્યા સુધી અને બપોરે 2 વાગ્યાથી રાત્રે 10 વાગ્યા દરમિયાન લાગુ થશે. નિયમિત મુલાકાતીઓ માટે ₹300ના માસિક પાસનો વિકલ્પ છે, જેમાં અગિયાર મહિનાના પાસ પર એક મહિનાની છૂટ આપવામાં આવશે.

આ પણ વાંચો: અમદાવાદનું વસ્ત્રાપુર તળાવ ફરીથી ખુલશે, જાણો ક્યારે થશે લોકાર્પણ

પાલતુ પ્રાણીઓની સંભાળ માટે કોર્નર

રિડેવલપમેન્ટ કરાયેલા કરાયેલા તળાવમાં મોર્નિંગ વોકર્સ માટે એક સમર્પિત ‘પાલતુ પ્રાણી સંભાળ કેન્દ્ર’ હશે. મુલાકાતીઓ તેમના પાલતુ પ્રાણીઓને કોઈ પણ ખર્ચ વિના આ સુવિધા પર છોડી શકે છે, જ્યાં તેમની દેખરેખ રાખવા માટે એક પ્રશિક્ષક પણ હાજર રહેશે. તેમાં ૧૫ જેટલા પાલતુ પ્રાણીઓને રાખવાની ક્ષમતા હશે.

ઉલ્લેખનીય છે કે, વડોદરામાં જાહેર બગીચાઓમાં આવતા તમામ મુલાકાતીઓને પોતાની માહિતી આપી, રજિસ્ટ્રેશન કરાવ્યા બાદ પ્રવેશ આપવાનો મહાનગરપાલિકાએ નિયમ બનાવ્યો છે. બુધવારથી અહીંના ચાર જાણીતા બગીચા કમાટીબાગ, હરણી બાગ, ગોત્રી બાગ અને લાલબાગમાં આ રજિસ્ટ્રેશનનો નિયમ લાગુ પાડવામાં આવ્યો હતો. અમુક અમસામાજિક તત્વો દ્વારા કમાટીપુરમાં રંજાડવાના કિસ્સા બહાર આવ્યા બાદ મનપાએ આ નવો નિયમ લાગુ થયો હતો. અધિકારીઓના જણાવ્યા અનુસાર આમ કરવાથી મુલાકાતીઓની સુરક્ષા વધશે.