અમદાવાદઃ રાજ્યમાં સુધીમાં 107.77 ટકા વરસાદ નોંધાયો છે. સૌરાષ્ટ્ર સિવાયના તમામ ઝોનમાં સો ટકાથી વધુ વરસાદ વરસ્યો છે. કચ્છમાં 135.95, ઉત્તર ગુજરાતમાં 118.72, મધ્ય પૂર્વમાં 110.10, સૌરાષ્ટ્રમાં 93.36 અને દક્ષિણ ગુજરાતમાં 110.72 ટકા વરસાદ ખાબક્યો છે. હવામાન વિભાગ મુજબ, ગુજરાતમાં સિઝનનો 28 ટકા વધુ વરસાદ નોંધાયો છે. નવરાત્રિમાં ભારે વરસાદ પડી શકે છે.
હવામાન વિભાગના જણાવ્યા મુજબ, સાયક્લોનિક સર્ક્યુલેશન અને લો પ્રેશર સિસ્ટમ સક્રિય થતા વરસાદની સંભાવના છે. ગુજરાતમાં 18 સપ્ટેમ્બર સુધી ભારે વરસાદની આગાહી કરવામાં આવી હતી. દક્ષિણ ગુજરાતમાં ભારે વરસાદ થઈ શકે છે. અમદાવાદ શહેરમાં પણ હળવા વરસાદની આગાહી કરી હતી.
નવરાત્રિમાં ગાજવીજ સાથે વરસાદની આગાહી
હવામાન વિભાગના જણાવ્યા પ્રમાણે રાજ્યમાં 14થી 16 સપ્ટેમ્બર સુધી દક્ષિણ ગુજરાતમાં હળવાથી ભારે વરસાદની શક્યતાઓ છે. નવરાત્રિમાં પણ ગાજવીજ સાથે હળવાથી ભારે વરસાદ થઈ શકે છે. રાજ્યના કેટલાક જિલ્લાઓમાં નવરાત્રિમાં વરસાદ થઈ શકે છે. રાજ્યના પાંચ ઝોનમાં વરસાદની શક્યતાઓ છે. હવામાન વિભાગના જણાવ્યા પ્રમાણે સુરત, તાપી, નવસારી, વલસાડ, દમણ, દાદરાનગર હવેલી સહિતના વિસ્તારોમાં વરસાદની શક્યતાઓ છે. માછીમારોને 16 સપ્ટેમ્બર સુધી દરિયો નહીં ખેડવા સૂચના આપવામાં આવી હતી.
ક્યાં કેટલો પડ્યો વરસાદ
સ્ટેટ ઈમરજન્સી ઓપરેશન સેન્ટરના આંકડા પ્રમાણે, રાજયમાં સાંજે 6 વાગ્યા સુધીમાં 9 તાલુકામાં વરસાદ નોંધાયો હતો. રાજુલામાં સૌથી વધુ 1.54 ઇંચ વરસાદ પડ્યો હતો. વલસાડમાં 1.5 ઇંચ, ખેરગામમાં 1.06 ઇંચ, પારડીમાં 0.28 ઇંચ, વાપીમાં 0.28 ઇંચ, ભરૂચમાં 0.20 ઇંચ, પલસાણામાં 0.16 ઇંચ, સુબીરમાં 0.12 ઇંચ, ચિખલીમાં 0.08 ઇંચ વરસાદ ખાબક્યો હતો.
રાજ્યમાં જળાશયોની શું છે સ્થિતિ
સરદાર સરોવર ડેમ 91.72 ટકા ભરાયેલો છે. રાજ્યના અન્ય 206 જળાશયોમાં 89.26 ટકા જળસંગ્રહ છે. રાજ્યમાં 106 ડેમ સો ટકા ભરાયેલા છે, જ્યારે 139 ડેમ હાઈ એલર્ટ પર છે. 65 ડેમ 70 થી 100 ટકા, 15 ડેમ 50 થી 70 ટકા, 11 ડેમ 25 થી 50 ટકા વચ્ચે અને 9 ડેમ 25 ટકાથી ઓછા ભરાયેલા છે. રાજ્યમાં 18 ડેમ એલર્ટ પર છે અને 14 ડેમ વોર્નિંગ પર છે. રાજ્યમાં વરસાદના કારણે 155 રોડ રસ્તા બંધ છે.
આ પણ વાંચો…ગુજરાતમાં બે દિવસ બાદ વધશે વરસાદનું જોરઃ 15 સપ્ટેમ્બર સુધી માછીમારોને દરિયો નહીં ખેડવા સૂચના
