રાજ્યમાં 5 દિવસ ભારે વરસાદની આગાહી, ધરમપુરમાં 4 ઇંચ સહિત 207 તાલુકામાં મેઘમહેર

અમદાવાદઃ રાજ્યમાં છેલ્લાં ઘણાં દિવસોથી અનેક વિસ્તારોમાં ભારે વરસાદ પડી રહ્યો છે. હવામાન વિભાગ મુજબ રાજ્યમાં હજુ પણ પાંચ દિવસમાં ભારેથી અતિભારે વરસાદની આગાહી છે. આજથી વિવિધ વિસ્તારોમાં વરસાદનું જોર ઘટશે.

અરબી સમુદ્રમાં અપર એર સાયક્લોનિક સર્ક્યુલેશન અને મોન્સૂન ટ્રફ સક્રિય થવાને કારણે આ સિસ્ટમની અસર જોવા મળશે. આ બે સિસ્ટમની સંયુક્ત અસરને કારણે રાજ્યમાં ગાજવીજ સાથે વરસાદ થવાની સંભાવના છે.

આપણ વાંચો: કલ્યાણપુરમાં 10.75 ઇંચ વરસાદ, સૌરાષ્ટ્રમાં બે દિવસ ભારે વરસાદની આગાહી, જાણો છેલ્લા 24 કલાકના આંકડા

રાજ્યમાં સાંજે 6 વાગ્યા સુધીમાં 207 તાલુકામાં વરસાદ પડ્યો હતો. વલસાડના ધરમપુર તાલુકામાં સૌથી વધુ 4.17 ઇંચ વરસાદ વરસ્યો હતો. ભેંસાણમાં 3.9 ઇંચ, પારડીમાં 3.54 ઇંચ, વ્યારામાં 3.27 ઇંચ, સોનગઢમાં 2.87 ઇંચ. ગરુડેશ્વરમાં 2.83 ઇંચ, નાંદોદમાં 2.76 ઇંચ, ખેરગામમાં 2.68 ઇંચ, ખેડબ્રહ્મામાં 2.48 ઇંચ વરસાદ નોંધાયો હતો.

રાજ્યમાં ચાર તાલુકામાં ત્રણ ઇંચથી વધારે, 10 તાલુકામાં બે ઇંચથી વધારે, 36 તાલુકામાં એક ઇંચથી વધારે વરસાદ પડ્યો હતો.

સ્ટેટ ઈમરજન્સી ઓપરેશન સેન્ટર – ગાંધીનગર મુજબ, રાજ્યમાં સિઝનનો સરેરાશ 79.06 ટકા વરસાદ વરસ્યો છે. કચ્છમાં 82.91 ટકા, દક્ષિણ ગુજરાતમાં 81.68 ટકા, ઉત્તર ગુજરાતમાં 79.33 ટકા, સૌરાષ્ટ્રમાં 78.57 ટકા અને પૂર્વ મધ્યમાં 75.56 ટકા વરસાદ વરસ્યો છે. નર્મદા ડેમ તેની કુલ સંગ્રહ ક્ષમતાનો 82.41 ટકા ભરાયેલો છે.

રાજયના 206 જળાશયોમાં 77.21 ટકા જળસંગ્રહ છે. રાજ્યમાં 59 ડેમ 100 ટકા ભરાયેલા છે અને 78 ડેમ હાઇ એલર્ટ પર છે. વરસાદના કારણે રાજ્યમાં કુલ 220 રોડ રસ્તા બંધ છે.