અમદાવાદઃ કેન્દ્ર સરકાર દ્વારા લોકોના લાભાર્થે અનેક યોજનાઓ ચલાવવામાં આવે છ. જેમાંની એક પ્રધાનમંત્રી આવાસ યોજના (શહેરી) છે. ગુજરાત હાઉસિંગ બોર્ડ દ્વારા ગુજરાત અર્બન ડેવલોપમેન્ટ મિશન (GUDM)ની સફળતાના 20 વર્ષ પૂર્ણ થવા પર એક મહત્ત્વની જાહેરાત કરવામાં આવી હતી. જે અંતર્ગત પ્રધાનમંત્રી આવાસ યોજના (શહેરી) 2.0 હેઠળ રાજ્યના 13 શહેરોમાં 20 સ્થળોએ આવાસની જાહેરાત કરવામાં આવી હતી.
કયા શહેરોમાં બનાવાશે મકાન
પ્રધાનમંત્રી આવાસ યોજના દ્વારા અમદાવાદના હાથીજણ અને ધોળકા, સુરતના છપરાભાઠા, કોસાડ, અમરોલી, સચિન-કનસાડ, વડોદરા ગોરવા, ગોત્રી, અટલાદરા, પાદરા, રાજકોટના ઉપલેટા, જેતપુર, ખેડાના મહેમદાવાદ, ભાવનગરના તરસમિયા, શાસ્ત્રીનગર, મહુવા, ભરૂચના અંકલેશ્વર, નવસારી તેમજ અમરેલી જેવા સ્થળોએ વ્યાજબી દરે મકાન ફાળવવામાં આવશે.
અરજી વખતે 7500 રૂપિયા ભરવા પડશે
9 લાખ રૂપિયામાં 41.00 ચો.મીટર કાર્પેટ એરિયામાં 1.5 બેડરૂમ, હોલ અને કિચન આપવામાં આવશે. આ યોજના અંતર્ગત મકાન મેળવવા માંગતા અરજદારો ગુજરાત હાઉસિંગ બોર્ડની સત્તાવાર વેબસાઈટ gujarathousingboard.gujarat.gov.in પર અરજી કરી શકશે. અરજી કરતી વખતે અરજદારોએ 7500 રૂપિયા ભરવા પડશે.
