અમદાવાદ: દેશભરમાં અને શહેરમાં સુપ્રીમ કોર્ટના હસ્તક્ષેપ છતાં રખડતા કૂતરાંઓનો આતંક ઓછો થવાનું નામ નથી લઈ રહ્યો, જેના કારણે ઘણા વિસ્તારોમાં બાળકોને એકલા ઘરની બહાર નીકળતા ડર લાગે છે. સોલા સિવિલ હોસ્પિટલના આંકડા પરથી આ સ્થિતિ સ્પષ્ટ થાય છે, જ્યાં 1 જાન્યુઆરીથી 19 નવેમ્બર, 2025 સુધીમાં કૂતરા કરડવાના કુલ 17,226 કેસમાં લોકોની સારવાર કરવામાં આવી છે. આ આંકડામાં 3,557 નવા દર્દીઓ અને 13,669 ફોલો-અપ કેસનો સમાવેશ થાય છે.
સરેરાશ, સોલા સિવિલ હોસ્પિટલમાં દરરોજ 11 નવા કેસ અને કુલ (નવા અને ફોલો-અપ) મળીને આશરે 54 કેસની સારવાર થાય છે. આ સિવાય, અમદાવાદની અસારવા સિવિલ હોસ્પિટલમાં પણ દરરોજ અંદાજે 33 કૂતરાં કરડવાના કેસની સારવાર થાય છે.
સોલા સિવિલ હોસ્પિટલના આસિસ્ટન્ટ RMO ડૉ. કિરણ ગોસ્વામીએ જણાવ્યું હતું કે, વર્ષ 2024માં હોસ્પિટલમાં કૂતરાં કરડવાના 19,942 દર્દીઓની સારવાર કરવામાં આવી હતી, જેમાં 15,677 નવા કેસ અને 4,265 ફોલો-અપ કેસ હતા. જ્યારે 2025માં, માત્ર સાડા દસ મહિનાના સમયગાળામાં જ હોસ્પિટલમાં 17,226 દર્દીઓની સારવાર થઈ ચૂકી છે. આ વર્ષે જાન્યુઆરી મહિનામાં સૌથી વધુ 2,099 કેસ નોંધાયા હતા. આ ગંભીર આંકડાઓ દર્શાવે છે કે, રખડતા કૂતરાંની સમસ્યા શહેરીજનો માટે કેટલો મોટો જોખમ બની ગઈ છે.
નિષ્ણાતો અને સ્થાનિક લોકો દ્વારા રખડતા કૂતરાંની વસ્તીને નિયંત્રિત કરવા અને કૂતરા કરડવાની ઘટનાઓ ઘટાડવા માટે અસરકારક નસબંધી (sterilization) કાર્યક્રમની તાત્કાલિક જરૂરિયાત પર ભાર મૂકવામાં આવ્યો છે. જ્યાં સુધી આ સમસ્યાનો કાયમી ઉકેલ ન આવે, ત્યાં સુધી અમદાવાદના નાગરિકો, ખાસ કરીને બાળકો, સતત ભયના ઓથાર હેઠળ જીવવા મજબૂર છે.
આ પણ વાંચો…અમદાવાદમાં દરરોજ સરેરાશ 181 લોકોને કરડે છે કૂતરા, શહેરમાં પ્રથમ વખત થશે વસતી ગણતરી
