શટલ ઓટોરિક્ષા પાસેથી મહિનાદીઠ હજાર રૂપિયાનો હપ્તો લેવાતો હોવાનો કૉંગ્રેસનો આક્ષેપ

અમદાવાદઃ ગુજરાત પ્રદેશ કૉંગ્રેસે આક્ષેપ કર્યો હતો કે અમદાવાદના ઓટોરિક્ષા ડ્રાઈવરો પાસેથી પોલીસ અને તંત્રના અધિકારીઓ દર મહિને હપ્તા વસૂલી કરે છે. શહેરમાં શટલ રિક્ષા ચલાવવા માટે આ હપ્તા આપવામાં આવે છે.

રાજીવ ગાંધી ભવન અમદાવાદ ખાતે પ્રેસ કોન્ફરન્સને સંબોધતા ગુજરાત પ્રદેશ કોંગ્રેસ સમિતિના પ્રવક્તા હેમાંગ રાવલે જણાવ્યું હતું કે તેમણે એક સ્ટિંગ ઑપરેશન કર્યું હતું અને જેના આધારે તેમણે આક્ષેપો કર્યા હતા કે રિક્ષાવાળાએ સ્પષ્ટ રીતે સ્વીકાર્યું હતું કે પોલીસ વહીવટદાર દ્વારા દર મહિને રીક્ષા નો રૂ. 1,000 નો લેવામાં આવે છે અને વાર્ષિક રૂ. 12,000 ગેરકાયદેસર રીતે ચૂકવવામાં આવે છે, કારણકે અમદાવાદની અંદર શટલ રીક્ષા ચલાવવાની પરમિશન નથી. અમદાવાદની અંદર કુલ ત્રણ લાખ રીક્ષાઓમાંથી દોઢ લાખ જેટલી રીક્ષા જો શટલ તરીકે ચાલે છે તે મુજબ માત્ર અમદાવાદમાં જ પોલીસ વહીવટદારના માધ્યમથી 180 કરોડ રૂપિયાથી વધારે હપ્તાની ઉઘરાણી થાય છે.

આ પણ વાંચો : હોમગાર્ડઝ જવાનોની નિવૃત્તિ વયમર્યાદામાં ત્રણ વર્ષન વધારો કર્યો રાજ્ય સરકારે

રાવલે જણાવ્યું હતું કે હપ્તો આપનાર રીક્ષામાં વિશિષ્ટ પ્રકારનું સ્ટીકર લગાવવામાં આવે છે, જે હપ્તો ભર્યાનું પ્રમાણ ગણાય છે અને એવી રીક્ષાઓને પોઈન્ટ પર રોકાતી નથી. દર મહિને સ્ટીકરની ડિઝાઇન બદલાય છે અને દિવાળી સમયે ખાસ દીવો સ્વરૂપનું સ્ટીકર લગાડવામાં આવે છે.

હેમાંગ રાવલે જણાવ્યું હતું કે જો માત્ર અમદાવાદના વ્યવહારનો અંદાજ 180 કરોડ રૂપિયા વાર્ષિક થાય છે તો સમગ્ર ગુજરાતમાં આ ભ્રષ્ટાચારી કૌભાંડ 1000 કરોડ રૂપિયા થી વધુનું હોવાને ઇનકાર કરી શકાય તેમ નથી. એ નિર્વિવાદ છે કે અમદાવાદના રીલીફ રોડ, રતનપોળ, ગાંધીરોડ, કાળુપુર, સ્ટેશન જેવી જગ્યાએ ટેક્સીઓ જવાની ના પાડે છે ત્યારે શેરીંગ રિક્ષા જ આમજનતા માટે પરિવહનનું સાધન છે.

આ પણ વાંચો : ગુજરાતના ક્યા 5 જિલ્લામાં પોલીટેકનિક સ્થાપવાની મળી મંજૂરી ?

રાવલે માગણી કરી હતી કે સ્ટીકર આધારિત હપ્તા ઉઘરાણીના મુદ્દે તાત્કાલિક અને ગંભીર તપાસ કરવામાં આવે. જવાબદાર અધિકારીઓ સામે કડક પગલાં લેવામાં આવે અને ગરીબ રિક્ષાચાલકોને તેમના જીવન નિર્વાહ માટે શેરિંગ પેસેન્જર લઈને ચાલવાની કાયદેસર છૂટ આપવામાં આવે, તેવી માગણી તેમણે કરી હતી.