અમદાવાદ: ગુજરાતમાં કાળઝાળ ગરમી બાદ વાતાવરણમાં પલટો આવ્યો હતો. ગરમીમાં એકા એક ઘટાડો નોંધાયો હતો. પવનની દિશા બદલાતા તાપમાન ઘટ્યું હતું. સૌથી વધુ તાપમાન રાજકોટમાં 37.4 ડિગ્રી નોંધાયું હતું. ગતરોજ કચ્છ જિલ્લાના વાતાવરણમાં અચાનક પલટો આવતા કેટલાક વિસ્તારમાં વરસાદી ઝાપટાં પડ્યા હતા.
આવતીકાલથી બેથી ત્રણ ડિગ્રી તાપમાન વધવાનું અનુમાન
હવામાન વિભાગ દ્વારા ગુજરાતના હવામાન અંગેની આગાહી કરતા જણાવ્યું છે કે, આવનારા પાંચ દિવસ દરમિયાન ગુજરાતનું હવામાન સૂકું રહેશે. મહત્તમ તાપમાનની વાત કરીએ તો, 24 કલાકમાં કોઈ મોટો ફેરફાર થશે નહીં. તે બાદ બેથી ત્રણ ડિગ્રી તાપમાન વધવાનું અનુમાન છે.
અંબાલાલ પટેલે શું કરી છે આગાહી
હવામાન નિષ્ણાત નિષ્ણાત અંબાલાલ પટેલે માર્ચ મહિનામાં ગુજરાતના હવામાનમાં પલટો આવવાની સંભાવના વ્યક્ત કરી છે. 21થી 23 માર્ચ દરમિયાન રાજ્યમાં ગરમીમાં વધારો થઇ શકે છે. ઉત્તર ગુજરાત અને પૂર્વ ગુજરાતના ઘણા ભાગોમાં મહત્તમ તાપમાન 40 ડિગ્રીની આસપાસ રહી શકે છે. કચ્છમાં પણ મહત્તમ તામપાન 39થી 40 ડિગ્રીની આસપાસ રહેવાની શક્યતા છે. ઉત્તર સૌરાષ્ટ્રના કેટલાક વિસ્તારોમાં પણ ગરમીનો પારો 39થી 40 ડિગ્રીની આસપાસ રહી શકે છે. આ ઉપરાંત મધ્ય ગુજરાતના અમુક ભાગોમાં મહત્તમ તામપાન 41 ડિગ્રી સુધી પહોંચી શકે છે. અત્રે ઉલ્લેખનીય છે કે હવામાન નિષ્ણાતની હવામાન અંગેની આગાહી સાચી પડી હોય તેમ 20મી માર્ચના રોજ કચ્છમાં વરસાદ વરસ્યો હતો.
આ પણ વાંચો…IPS અધિકારી રવિન્દ્ર પટેલનાં ઘરે SEBI નાં દરોડા; શેર બજારમાં કૌભાંડની આશંકા…
કચ્છ જિલ્લામાં કમોસમી વરસાદ
ગતરોજ કચ્છ જિલ્લામાં બપોર પછી ઘણી બધી જગ્યાએ વરસાદી ઝાપટાં પડ્યા હતા. ભુજમાં વરસાદી ઝાપટાં પડતાં વાતાવરણમાં ઠંડક પ્રસરી ગઈ હતી. નખત્રાણાના પાવરપટ્ટી વિસ્તારમાં અચાનક કમોસમી વરસાદ વરસ્યો હતો. જેના કારણે અહીંયા તો રોડ રસ્તા ભીના થઈ ગયા હતા. સાથે જ આ કમોસમી વરસાદના કારણે ખેડૂતોના માથે ચિંતાના વાદળો ઘેરાઈ ગયા હતા.
જાણો કયાં કેટલું તાપમાન નોંધાયું
ગતરોજ અમદાવાદમાં 35.8 ડિગ્રી, ગાંધીનગરમાં 35.8 ડિગ્રી, ડીસામાં 36.7 ડિગ્રી, વડોદરામાં 36.4 ડિગ્રી, સુરતમાં 35.4 ડિગ્રી, ભુજમાં 35.5 ડિગ્રી, અમરેલીમાં 36 ડિગ્રી, પોરબંદરમાં 34 ડિગ્રી, ભાવનગરમાં 34.7 ડિગ્રી, સુરેન્દ્રનગરમાં 35.5 ડિગ્રી, મહુવામાં 35.8 ડિગ્રી, કેશોદમાં 36.2 ડિગ્રી તાપમાન નોંધાયું હતું.