અમદાવાદ: શહેરના ફતેહવાડી વિસ્તારમાં ગેરકાયદેસર રીતે કાર્યરત એક કોલ સેન્ટરનો વેજલપુર પોલીસે પર્દાફાશ કર્યો છે, જે અમેરિકાના નાગરિકોને નિશાન બનાવીને મોટા પાયે છેતરપિંડી આચરતું હતું. પોલીસે બાતમીના આધારે ફતેહવાડીના કાદરી પાર્ટી પ્લોટ સામે દરોડો પાડી મુખ્ય આરોપી સોયબ ઘાંચી સહિત પાંચ લોકો સામે ગુનો નોંધીને તપાસ હાથ ધરી છે.
મળતી વિગતો અનુસાર, આ કોલ સેન્ટરની મોડસ ઓપરેન્ડી મુજબ, આરોપીઓ પોતાને અમેરિકાથી બોલતા હોવાનો ઢોંગ કરીને અમેરિકન નાગરિકો પાસેથી પેડે લોન પ્રોસેસિંગ ફીના નામે વોલમાર્ટ, વિઝા કાર્ડ અને માસ્ટરકાર્ડ જેવી કંપનીઓના ગિફ્ટ કાર્ડની ખરીદી કરાવતા હતા. ઝડપાયેલા આરોપી પાસેથી અમેરિકાના નાગરિકોનો ડેટા, ક્રિપ્ટો પેમેન્ટની વિગતો ધરાવતો મોબાઈલ ફોન અને અન્ય ડિજિટલ પુરાવા જપ્ત કરવામાં આવ્યા છે. પોલીસને સ્થળ પરથી કોમ્પ્યુટર પણ મળ્યા છે અને આ કોલ સેન્ટર કેટલા સમયથી ચાલતું હતું તે દિશામાં પણ તપાસ શરૂ છે.
આ પણ વાંચો: રાજકોટમાં નકલી સેક્સ પાવર બૂસ્ટર વેચવાનું કોલ સેન્ટર ઝડપાયું, ડોક્ટર બનીને ૪,૦૦૦ લોકો સાથે ઠગાઈ
સોયબ ઘાંચી ટેલિગ્રામ અને વોટ્સએપ પર ‘પ્રોફેસર 2’ જેવા ગુપ્ત ગ્રૂપો ચલાવતો હતો, જ્યાંથી તે અમેરિકન નાગરિકોનો ડેટા મેળવતો હતો. ગિફ્ટ કાર્ડ મેળવ્યા પછી, તે તેને ‘Payment mode Dragon 2025 Ghost with R U U Dhamal New’ નામના અન્ય ગ્રૂપમાં પ્રોસેસ કરાવતો હતો. આ પ્રોસેસ દ્વારા ગિફ્ટ કાર્ડની રકમને ક્રિપ્ટો અને બિટકોઈન વોલેટ એપ્લિકેશન મારફતે યુએસડીટી ક્રિપ્ટોકરન્સીમાં રૂપાંતરિત કરવામાં આવતી હતી.
આ રીતે ક્રિપ્ટોમાં મેળવેલા નાણાંને ભારતીય ચલણમાં ફેરવવા માટે સોયબ અન્ય આરોપીઓ શોએબ કુરેશી, સાકીબ અને યાસર મકવાણા ઉર્ફે મેકનો સપોર્ટ લેતો હતો. આ ત્રણેય વ્યક્તિઓ યુએસડીટી લઈને તેને આંગડિયા પેઢી દ્વારા રોકડમાં મુખ્ય આરોપી સોયબને પહોંચાડતા હતા.
