અમદાવાદ: શહેરમાં ફરી એકવખત જાહેર પરિવહનની બસની પુરપાટ ઝડપના કારણે અકસ્માત સર્જાયો છે. અમદાવાદના ખોડિયારનગર વિસ્તારમાં બીઆરટીએસ બસની ટક્કરથી રોડ ક્રોસ કરી રહેલા રાહદારીનું મોત નીપજ્યું છે.
મળતી વિગતો અનુસાર, અમદાવાદ શહેરના ખોડિયારનગર વિસ્તારમાં બીઆરટીએસ બસ ચાલકે અકસ્માત સર્જ્યો હતો. રસ્તા ચાલ્યા જતા રાહદારીને બીઆરટીએસ બસ ચાલકે ટક્કર મારતા રાહદારીનં સ્થળ પર જ મોત થયું હતું. રાહદારી રોડ ક્રોસ કરતો હતો તે સમયે BRTS બસ ચાલકે ટક્કર મારી હતી. પોલીસે BRTS બસના બસચાલકની અટકાયત કરી તપાસ હાથ ધરી છે.
ઉલ્લેખનીય છે કે મૃતક ઉત્તર પ્રદેશનો રહેવાસી હોય અહી રોજગારી માટે આવ્યો હતો. મૃતક ફુલેન્દ્ર પ્રસાદ તેના ભાઈ સાથે દાણીલીમડામાં રહી અને મજૂરી કામ કરીને ગુજરાન ચલાવતો હતો. તેઓ ગઇકાલ રાત્રે શાકભાજી લેવા માટે બહાર નીકળ્યા હતા તે દરમિયાન આ અકસ્માત સર્જાયો હતો.
