કોમનવેલ્થ પૂર્વે રિયલ્ટી સેક્ટરમાં બૂસ્ટ! અમદાવાદમાં SG હાઇવે પર રૂ. 2 લાખ/ચો.વારના ભાવે જમીનનો સોદો
અમદાવાદ: વર્ષ 20230ના કોમનવેલ્થ ગેમ્સની યજમાની ભારતના હેરિટેજ સિટી અમદાવાદને મળી છે, ત્યારથી તેની અસર તમામ ક્ષેત્રોમાં નોંધાશે તેવી ચર્ચાઓની વચ્ચે શહેરના રિયલ એસ્ટેટ સેક્ટરમાં સકારાત્મક અસર ગણી શકાય તેમ શહેરના એક અગ્રણી ડેવલપરે SG રોડ પર, કર્ણાવતી ક્લબની સામેની બાજુએ સ્થિત 25,000 ચોરસ વાર જમીન માટે ₹500 કરોડનો જૉઇન્ટ ડેવલપમેન્ટ (JD) કરાર કર્યો છે. આ સોદાથી જમીનની કિંમત પ્રતિ ચોરસ વાર ₹2 લાખ જેટલી આંકવામાં આવી છે, જે કોરોના કાળ પછી અનેક સંઘર્ષનો સામનો કરી રહેલા આ ક્ષેત્રમાં ઘણી ઊંચી કિંમત છે.
કોરોના પછીના સમયગાળામાં પ્રતિ ચોરસ વારની કિંમત રૂ. 1.25 લાખથી રૂ. 1.5 લાખ આંકવામાં આવતી હતી, તેના સ્થાને પ્રતિ ચોરસ વાર રૂ. 2 લાખ જેટલી કિંમત રેસિડેન્શિયલ-3 ઝોનમાં થયેલો ઊંચો ભાવનો સોદો અભૂતપૂર્વ માનવામાં આવે છે. નોંધનીય છે કે ત્રણ વર્ષ પહેલાં આ ઝોનમાં જમીનના ભાવ લગભગ રૂ. 1 લાખ પ્રતિ ચોરસ વાર હતા, એટલે કે આ સોદામાં કિંમતોમાં 100% નો વધારો દર્શાવ્યો છે.
આ પણ વાંચો: એકસ્ટ્રા અફેરઃકોમનવેલ્થ ગેમ્સથી ગુજરાતના અર્થતંત્રને બૂસ્ટર ડોઝ મળશે
મળતી વિગતો અનુસાર આ જમીન પર રૂ. 1,000 કરોડના કુલ ખર્ચે એક ભવ્ય અને આઇકૉનિક પ્રોજેક્ટ બનાવવાની યોજના છે. ડેવલપર અહીં ફાઇવ સ્ટાર હૉટેલ-કમ-કોમર્શિયલ પ્રોજેક્ટ બનાવશે, જેમાં અંદાજે 20-22 લાખ ચોરસ ફૂટનું કન્સ્ટ્રક્શન કરવામાં આવશે. આ પ્રોજેક્ટમાં 4-સ્ટાર કૅટેગરીના સર્વિસ અપાર્ટમેન્ટનો પણ સમાવેશ કરવામાં આવશે. આ પ્રોજેક્ટ માટે હૉટેલ પોલિસી હેઠળ મંજૂરી મેળવવામાં આવી છે, જે ન્યૂનતમ 4 FSI (ફ્લોર સ્પેસ ઇન્ડેક્સ) આપે છે.
આ પ્રોજેક્ટને આંતરરાષ્ટ્રીય સ્તરનો લેન્ડમાર્ક બનાવવા માટે એક આંતરરાષ્ટ્રીય આર્કિટેક્ટ ફર્મને હાયર કરવાની પ્રક્રિયા ચાલી રહી છે. ડેવલપરે જણાવ્યું કે આ પ્રોજેક્ટની ઊંચાઈ અંદાજે 22 માળથી વધુ નહીં હોય અને સૌથી મહત્ત્વની વાત એ છે કે આ પ્રોજેક્ટ CWG 2030ના એક વર્ષ પહેલાં તૈયાર થઈ જવાની સંભાવના છે. નિષ્ણાતોના મતે, CWG 2030ને ધ્યાનમાં રાખીને અમદાવાદ અને ગાંધીનગરમાં આગામી સમયમાં 4,000થી 5,000 ફાઇવ-સ્ટાર કૅટેગરીના હૉટેલ રૂમની વધારાની જરૂરિયાત ઊભી થશે. હાલમાં અમદાવાદ અને ગાંધીનગરમાં 10,000 જેટલા સ્ટાર-કૅટેગરીના રૂમ છે, જેમાંથી લગભગ 4,000 રૂમ ફાઇવ-સ્ટાર છે.
