આંતરારાજ્ય સાઈબર ફ્રોડ કેસમાં ભાવનગરના એનએસયુઆઈ પ્રમુખની ધરપકડ

(અમારા પ્રતિનિધિ તરફથી)

અમદાવાદઃ શહેરની સાયબર ક્રાઇમ શાખાએ ભાવનગર જિલ્લા એનએસયુઆઈના પ્રમુખ અર્શમાન ખાન જોરાવર ખાન શુક (બલુચ) ની ધરપકડ કરી હતી, જે કથિત રીતે આંતરરાજ્ય સાયબર છેતરપિંડીના ગુનામાં સંકળાયેલો છે. અર્શમાનએ કથિત રીતે આંતરરાષ્ટ્રીય સાયબર ક્રાઇમ સિન્ડિકેટને બેંક ખાતા પૂરા પાડ્યા હતા અને હવાલા વ્યવહારો દ્વારા ભારે કમિશન મેળવ્યું હતું.

૧૦૭ ફ્રેન્કલિન ટેમ્પલટન ઇન્વેસ્ટમેન્ટ સ્ટ્રેટેજી નામના નકલી વોટ્સએપ ઇન્વેસ્ટમેન્ટ ગ્રુપમાં જોડાયા બાદ અમદાવાદના એક રહેવાસી સાથે રૂ. ૫૦.૫૦ લાખની છેતરપિંડી થયાની ફરિયાદની તપાસ દરમિયાન આ ધરપકડ કરવામાં આવી હતી.

ફેલિસિટી વોલ્શ, જેફ મેસન અને ફ્રેન્કલિન ટેમ્પલટન (બી-એચએનઆઈ) નામથી કાર્યરત વ્યક્તિઓએ પીડિતને છેતરપિંડીવાળી એપ ડાઉનલોડ કરવા અને આઈપીઓ અને શેરમાં રોકાણ કરવા માટે લલચાવ્યા હતા. પીડિતે પચાસ લાખ રૂપિયાથી વધુ ઘણા બેંક ખાતાઓમાં ટ્રાન્સફર કર્યા હતા, જેમાંથી ફક્ત રૂ. ૩ લાખ પરત મળ્યા હતા.

આપણ વાચો: સુરત પોલીસે ધ્વજવંદન દરમિયાન ટ્રાફિક સુધારણા અને સાયબર ક્રાઇમ પર ભાર મુક્યો

પોલીસે પૈસાની તપાસ કરતા, તેમને જાણવા મળ્યું કે વૈદિક ભોગિનાલાલ જશુભાઈના બેંક ખાતામાં રૂ.૨,૯૯,૦૦૦ જમા કરવામાં આવ્યા હતા. તેણે તપાસકર્તાઓને જણાવ્યું કે તેણે જુનેદ મકુફભાઈ નામના વ્યક્તિને ચેક આપ્યો હતો, જેણે કહ્યું કે તેણે આંગડિયા રૂટ દ્વારા અર્શમાનને પૈસા આપ્યા હતા. આ માહિતી સાથે પોલીસ ભાવનગર પહોંચી હતી અને અર્શમાનની ધરપકડ કરી હતી.

અર્શમાન બાંધકામ અને સોનાના વેપારનો વ્યવસાય કરે છે અને રાજકીય વર્તુળોમાં ભાવનગર જિલ્લા નેશનલ સ્ટુડન્સ્ટ્સ યુનિયન ઓફ ઈન્ડિયા (એનએસયુઆઈ), જે કૉંગ્રેસની વિદ્યાર્થી પાંખી છે, તેના પ્રમુખ તરીકે જાણીતો છે.

આપણ વાચો: ગુજરાત સ્ટેટ સાયબર ક્રાઇમ સેલની પ્રશંસનીય કામગીરી; એક વર્ષમાં આટલા કરોડ રિકવર કર્યા

વધુ તપાસમાં જાણવા મળ્યું કે અર્શમાનના દુબઈ અને ચીન સ્થિત આંતરરાષ્ટ્રીય સાયબર ક્રાઈમ નેટવર્ક સાથે સંબંધો હતા. પોલીસ સૂત્રોના જણાવ્યા અનુસાર તેણે અલગ અલગ વ્યક્તિઓના 11 બેંક ખાતાઓ માટે દસ્તાવેજો પૂરા પાડ્યા હતા અને તે સારું કમિશન કમાતો હતો. તેની મોડસ ઓપરેન્ડીમાં કેટલાક નાણાને ક્રિપ્ટોકરન્સીમાં કન્વર્ટ કરવાનો પણ સમાવેશ થતો હતો અને પછી તેને વિદેશી ગેંગને ટ્રાન્સફર કરતો હતો.

ગુજરાત, તમિલનાડુ, રાજસ્થાન, તેલંગાણા અને આંધ્રપ્રદેશમાં નોંધાયેલી 27 સાયબર ક્રાઇમ ફરિયાદોમાં તેની સંડોવણી બહાર આવી હોવાનું પણ પોલીસ સૂત્રો પાસેથી જાણવા મળ્યું હતું. પોલીસે ગુનામાંથી મળેલી રકમમાંથી એકઠી કરેલી સંપત્તિ પણ જપ્ત કરી છે, જેમાં બીએમડબલ્યુ, ફોર્ચ્યુનર, થાર અને ઇનોવા જેવી અનેક લક્ઝરી કારનો સમાવેશ થાય છે.

આ સાથે તેણે થોડા મહિનાઓમાં જ મોટું રોકાણ કર્યું હોવાનું પણ પોલીસ સૂત્રોએ જણાવ્યું હતું. આ કેસમાં હજુ વધારે લોકોની સંડોવણી બહાર આવી શકે તેમ છે, તેમ પણ પોલીસે જણાવ્યું હતું.