સાવધાન! અમદાવાદમાં ડેવલપર્સે બનાવટી MoU બનાવી પ્લોટ વેચી દીધા! અંતે પોલીસ ફરિયાદ
અમદાવાદ: બોપલના એક રહેવાસી ભાવેશ પટેલે એથેરિયમ ઇન્ફ્રાકોન એલએલપી (Ethereum Infracon LLP)ના બે ડેવલપર્સ, ઉજાશ શાહ અને સંજય શાહ વિરુદ્ધ જમીન વિકાસના સોદામાં છેતરપિંડી અને બનાવટી દસ્તાવેજો તૈયાર કર્યાની ગંભીર ફરિયાદ નોંધાવી છે. ફરિયાદ મુજબ, આ ડેવલપર્સને અમદાવાદમાં વિવિધ જમીન પ્લોટ વિકસાવવા અને તેનું માર્કેટિંગ કરવાનું કામ સોંપવામાં આવ્યું હતું. જોકે, આ બંનેએ કથિત રીતે નકલી દસ્તાવેજો બનાવીને ભાવેશ પટેલની જાણ બહાર તે પ્લોટ્સ અન્ય ખરીદદારોને વેચી દીધા હતા. આ મામલે પોલીસે છેતરપિંડી, બનાવટ અને ગુનાહિત કાવતરાને લગતી ભારતીય ન્યાય સંહિતા (BNS)ની વિવિધ કલમો હેઠળ કેસ નોંધીને તપાસ હાથ ધરી છે.
ભાવેશ પટેલે વધુમાં આક્ષેપ કર્યો છે કે ઉજાશ શાહ અને સંજય શાહે તેમના નકલી હસ્તાક્ષર કરીને એક બોગસ MoU તૈયાર કરાવ્યું હતું. આ નકલી MoU ને નોટરાઇઝ કરાવીને તેનો ઉપયોગ સંભવિત ખરીદદારો અને નાણાકીય સંસ્થાઓને ગેરમાર્ગે દોરવા માટે કરવામાં આવ્યો હતો. આ ઉપરાંત, તેમણે દાવો કર્યો છે કે આરોપીઓએ અગાઉ રજિસ્ટર કરાયેલા વિકાસ કરારનો દુરુપયોગ કરીને ત્રીજા પક્ષકારો પાસેથી ફંડ પણ મેળવ્યું હતું.
ફરિયાદમાં કથિત રીતે બનાવટી દસ્તાવેજો, વિવાદિત મિલકત વ્યવહારો અને છેતરાયેલા વ્યક્તિઓની વિગતોનો સમાવેશ થાય છે. બનાવટી MoUને કાયદેસરતા પ્રદાન કરવામાં એક નોટરીની સંડોવણી હોવાની પણ શંકા છે. આ મામલાની ગંભીરતાને જોતા પોલીસ હવે આ સમગ્ર કાવતરાના મૂળ સુધી પહોંચવા માટે ઊંડાણપૂર્વક તપાસ કરી રહી છે.
આપણ વાંચો: Video: ગુજરાતી સંસ્કૃતિના રંગે રંગાયા ડોનાલ્ડ ટ્રમ્પ જુનિયર: જામનગરમાં અંબાણી સાથે ગરબાની મોજ માણી!
