અમદાવાદમાં કોમનવેલ્થ ગેમ્સની તૈયારીઓ શરુ, નરેન્દ્ર મોદી સ્ટેડિયમ નજીક ડિમોલિશન કરાયું

અમદાવાદઃ વર્ષ 2030ની કોમનવેલ્થ ગેમ્સ અમદાવાદમાં યોજાવાની છે. જેના કારણે અમદાવાદના મોટેરા વિસ્તારમાં આવેલા નરેન્દ્ર મોદી સ્ટેડિયમની બાજુમાંથી પસાર થનારા ટીપી રોડને ખોલવાની કામગીરી મ્યુનિસિપલ કોર્પોરેશન દ્વારા કરવામાં આવી હતી. મોટેરા વિસ્તારમાં બળદેવનગરમાં આવેલાં મકાનોને તોડવામાં આવ્યા હતા. પોલીસના ચુસ્ત બંદોબસ્ત વચ્ચે મ્યુનિસિપલ કોર્પોરેશનના પશ્ચિમ ઝોનના એસ્ટેટ વિભાગ દ્વારા ડિમોલિશનની કામગીરી કરવામાં આવી હતી. એએમસી દ્વારા કુલ 22 મકાન તોડી પાડવામાં આવ્યાં છે. જેમાંથી 7 જેટલા ઘર સ્થાનિકોએ જાતે જ તોડી પાડ્યાં હતાં.

હાઇકોર્ટે અરજી નકારી દીધી હતી

કોમનવેલ્થ ગેમ્સ માટે બનનારા એકવાટિક સ્ટેડિયમ નજીક જઈ શકાશે. મોટેરા બળદેવનગરનાં 29 જેટલાં મકાનો ટીપી રોડમાં આવતાં હોવાના પગલે નોટિસ આપીને ખાલી કરવા માટેની સૂચના આપવામાં આવી હતી. છતાં પણ રહીશોએ મકાન ખાલી નહોતાં કર્યાં. તે લોકોએ હાઇકોર્ટમાં અરજી કરી પરંતુ કોર્ટે નકારી દીધી હતી.

24 મીટર પહોળાઈનો ટીપી રસ્તો ખુલ્લો કરવામાં આવ્યો

સાબરમતી વિસ્તારમાંથી પસાર થતા 24 મીટર પહોળાઈનો ટીપી રસ્તો ખુલ્લો કરવામાં આવ્યો છે. આ ટીપી રોડ નરેન્દ્ર મોદી સ્ટેડિયમ પાસે કોમનવેલ્થ ગેમ્સ માટે બનનારા એકવાટિક સ્ટેડિયમ નજીક ખૂલશે. આ રોડને ખુલ્લો કરવો જરૂરી હોવાથી રહેણાક તથા કોમર્શિયલ પ્રકારનાં મળી કુલ 29 જેટલાં દબાણો દૂર કરવાની કામગીરી શરૂ કરવામાં આવી હતી. એસ્ટેટ વિભાગ દ્વારા 4 હિટાચી મશીન, બે જેસીબી અને મજૂરો સાથે ડિમોલિશનની શરૂ કરવામાં આવ્યું હતું.

આ પણ વાંચો…..કોમનવેલ્થ ગેમ્સના સમાપન બાદ અમદાવાદના એથ્લેટ વિલેજનું શું થશે?