પ્રોપર્ટી ટેક્સ વસૂલાત મુદ્દે અમદાવાદ મનપાની લાલ આંખ, એક દિવસમાં 4,200થી વધુ મિલકત સીલ

અમદાવાદઃ અમદાવાદ મ્યુનિ. કોર્પોરેશન દ્વારા પ્રોપર્ટી ટેક્સની વસુલાત મુદ્દે ઝુંબેશ શરૂ કરવામાં આવી છે. જેના એક જ દિવસમાં 4242 મિલકતો સીલ મારવામાં આવી હતી. આ મિલકતો સીલ મારી રૂ. 14.73 કરોડની વસુલાત કરવામાં આવી હતી. સૌથી વધુ પશ્ચિમ ઝોનમાં 1850 મિલકતો સીલ કરવામાં આવી હોવાનું જાણવા મળે છે. આગામી દિવસોમાં પણ કોર્પોરેશન દ્વારા સીલ અંગેની ઝુંબેશ ચાલુ રાખશે.

4242 મિલકતોને સીલ

પ્રાપ્ત માહિતી અનુસાર, પ્રોપર્ટી ટેક્સ વસુલાતની કામગીરી હાલમાં ચાલી રહી છે. જેમાં ટ્રીગર ઈવેન્ટ અંતર્ગત મંગળવારના રોજ બાકી કરદાતાઓ પૈકી 4242 મિલકતોને સીલ કરવામાં આવી હોવાનું જાણવા મળ્યું હતું. જેમાં સૌથી વધુ 1850 મિલકતો પશ્ચિમ ઝોનમાં સીલ કરવામાં આવી હતી. જ્યારે દક્ષિણ ઝોનમાં સૌથી વધુ આવક રૂ. 3.16 કરોડની વસુલવામાં આવી છે. આમ, એક જ દિવસમાં રૂ. 14.73 કરોડની વસૂલાત કરવામાં આવી હતી.

મધ્ય ઝોનમાં 2.43 કરોડની વસુલાત

મધ્ય ઝોનમાં 550 જેટલી મિલકતો સીલ કરવામાં આવી હતી અને રૂ. 2.43 કરોડની વસુલાત કરાઈ હતી. જે એકમો સીલ મારવામાં આવ્યા તે શાહપુર, રેંટિયાવાડી, ડબગરવાડ, જોર્ડન રોડ, અસારવા ગામ, ખાડીયા વિસ્તારના હોવાનું બહાર આવ્યું છે. જ્યારે ઉત્તર ઝોનમાં 412 મિલકતો સીલ કરી રૂ. 1.15 કરોડની વસુલાત કરાઈ છે. જેમાં આંબાવાડી વિસ્તારની કોમર્સિયલ મિલકતો, નાના ચિલોડા, સરદારનગર તથા કોતરપુર વિસ્તારની મિલકતોનો સમાવેશ થાય છે. આ ઉપરાંત દક્ષિણ ઝોનમાં 377 મિલકતો સીલ કરવામાં આવી છે અને રૂ. 3.16 કરોડની વસુલાત કરાઈ હતી. જેમાં બહેરામપુરા, મણિનગર, નારોલ, ગીતામંદિર, રબારી કોલોની સહિતના વિસ્તારોની મિલકતોનો સમાવેશ થાય છે.

પશ્ચિમ ઝોનમાં સૌથી વધુ 1850 મિલતતો સીલ

પૂર્વ ઝોનમાં 467 મિલકતો સીલ કરી રૂ. 1.36 કરોડની વસુલાત કરવામાં આવી હતી. જ્યારે પશ્ચિમ ઝોનમાં સૌથી વધુ 1850 મિલતતો સીલ કરી રૂ. 2.34 કરોડની વસુલાત કરાઈ હતી. પશ્ચિમ ઝોનમાં દિલીપ શોપીંગ સેન્ટર, વાસણા, સાબરમતી, ચાંદખેડા, પેલેડીયમ મોલ, હાઈવે મોલ, નવરંગપુરાની મિલકતોનો સમાવેશ થાય છે. જ્યારે ઉત્તર પશ્ચિમ ઝોનમાં 354 મિલકતો સીલ કરી રૂ. 1.70 કરોડની વસુલાત કરાઈ હતી, અને દક્ષિણ પશ્ચિમ ઝોનમાં 232 મિલકતો સીલ કરી રૂ. 2.60 કરોડની વસુલાત કરાઈ હતી. આમ, કુલ 4242 મિલકતો સીલ કરી રૂ. 14.73 કરોડની મિલકતો સીલ કરવામાં આવી હતી.