ખારીકટ કેનાલનું નવસર્જન! અમદાવાદને મળશે નવો ઓપ, 8 તબક્કામાં થશે બીજા તબક્કાનું કામ

અમદાવાદઃ શહેરના પૂર્વ વિસ્તારમાં પસાર થતી ખારીકટ કેનાલ પર 22.41 કિમીના બીજા તબક્કાના ડેવલપમેન્ટની કામગીરી માટે રૂપિયા 1061.43 કરોડનો ખર્ચ થશે. જે માટે કોંકણ રેલવે કોર્પોરેશન લિ.ને કામ સોપવામાં આવશે. કંપની દ્વારા 10 વર્ષ સુધી કેનાલ પર બનાવવામાં આવનારા રસ્તા સિવાયની તેમજ 3 વર્ષ માટે રસ્તાની લાયબિલિટી લેવાની શરત માન્ય રાખી છે. આ કેનાલના 7 વર્ષ સુધી નિભાવણી ખર્ચ પણ કંપની કરશે.

કેનાલ પર રોડ બનશે

નરોડા સ્મશાનગૃહથી SP રિંગ રોડ, વિંઝોલ વહેળાથી ઘોડાસર આવકાર હોલ થઈ વટવાથી રિંગ રોડ સુધી કેનાલને ઢાંકી દેવામાં આવશે. કેનાલને બંધ કરી તેના પર રોડ બનાવી દેવામાં આવશે. ખારીકટ કેનાલ ફેઝ 2 ડેવલોપમેન્ટના કારણે પૂર્વ વિસ્તારના નાગરિકોને વડોદરા એક્સપ્રેસ વે જવામાં સરળતા રહેશે. નરોડાથી વિંઝોલ સુધીના 12 કિલોમીટર લાંબા ખારીકટ કેનાલ ફેઝ 1 કામગીરી ચાલુ છે અને 31 ડિસેમ્બર સુધીમાં પૂર્ણ થવાની છે ત્યારે હવે ફેઝ 2ની કામગીરી શરૂ થતાં 25 લાખથી વધુ નાગરિકોને લાભ મળશે.

આ પણ વાંચો: અમદાવાદની ખારી કટ કેનાલની કાયાપલટનું કામ પુરજોશમા, બે વર્ષમા પૂર્ણ કરવાનો દાવો

અમદાવાદ મ્યુનિસિપલ કોર્પોરેશન દ્વારા ખારીકટ કેનાલની કુલ લંબાઈ પૈકી નરોડા મુક્તિધામથી વિંઝોલ વહેળા સુધીની કુલ આશરે 12.75 કિમી લંબાઈમાં પ્રથમ તબક્કા હેઠળ કેનાલ ડેવલોપમેન્ટની કામગીરી પૂર્ણતાને આરે છે. પ્રથમ તબક્કાની કામગીરીમાં સામેલ લંબાઈ બાદ બાકી રહેતી એસ.પી.રીંગ રોડથી મુઠીયા ડ્રેઈન થઈ નરોડા મુક્તિધામ સુધી, વિંઝોલ વહેળાથી ઘોડાસર આવકાર હોલ થઈ વટવા ગામ થઈ એસ.પી.રીંગ રોડ સુધી તથા વટવા ગામથી રોપડા તળાવ થઈ ખારીનદી સુધીનાં એક્ષટેન્શન સાથે કુલ મળી આશરે 22.41 કિમી લાંબી ખુલ્લી કેનાલને ઢાંકવામાં આવશે. કેનાલમાં ઉપલબ્ધ પહોળાઈ મુજબ અમુક હિસ્સામાં આર.સી.સી. સ્ટોર્મ વોટર બોક્ષ સહિત કેનાલ બોક્ષ સ્ટ્રક્ચર, અમુક હિસ્સામાં માત્ર કેનાલ બોક્ષ સ્ટ્રક્ચર અને અમુક હિસ્સામાં માત્ર સ્ટોર્મ વોટર કેનાલ બોક્ષ સ્ટ્રક્ચરમાં આર.સી.સી. બોક્ષ સ્ટ્રક્ચરનું બાંધકામ કરી તેનાં પરથી રસ્તો બનાવવામાં આવશે.

આ પણ વાંચો: Ahmedabad ના પૂર્વ-દક્ષિણ વિસ્તારની સુંદરતા વધશે, ખારી કટ કેનાલના સંપૂર્ણ વિકાસની દરખાસ્ત મંજૂર

જેના માટેની ટેન્ડર પ્રક્રિયા કરવામાં આવેલી હતી. જેનો અંદાજિત ખર્ચ રૂ. 979 કરોડ થતો હતો. ટેન્ડરમાં 9 જેટલા બિડર સામેલ થયા હતા. કોંકણ રેલવે કોર્પોરેશન લિમિટેડ – ફુજી સિલ્વર ટેક કોંક્રિટ પ્રાઇવેટ લિમિટેડ દ્વારા અંદાજિત ઓછા ભાવ રૂ. 829.92 કરોડનો ભાવ ભરવામાં આવ્યો હતો. કન્સલટન્ટ દ્વારા પ્રૂફ ચેકીગ, ડિઝાઇન કન્સલ્ટન્ટ અને પીએમસી કંપની સહિતનો કુલ 1061 કરોડનો ખર્ચ થશે. કુલ 8 ભાગમાં કામગીરી કરવામાં આવશે. અલગ અલગ 8 જગ્યા પર કામગીરી થશે.

અત્રે ઉલ્લેખનીય છે કે, અમદાવાદ શહેરના પૂર્વ વિસ્તારમાંથી પસાર થતી 142 વર્ષ જૂની 12 કિલોમીટર લાંબી ખારીકટ કેનાલ હવે ભૂતકાળ બની જશે. ખારીકટ કેનાલને સંપૂર્ણપણે ઢાંકી તેના ઉપર રોડ બનાવી લોકોને વર્ષો જૂની ખારીકટ કેનાલની ગંદકીમાંથી મુક્તિ મળશે.