અમદાવાદઃ ગુજરાતમાં શિક્ષણની ગુણવત્તા મુદ્દે સ્કૂલ-કોલેજથી લઈને યુનિવર્સિટી પર ગંભીર સવાલો કરવામાં આવી રહ્યા છે ત્યારે અમદાવાદ જેવા મહાનગરમાં અંગ્રેજી માધ્યમનો ક્રેઝ વધી રહ્યો હોવાના અહેવાલો મળી રહ્યા છે. શહેરની મ્યુનિસિપલ કોર્પોરેશન (એએમસી) દ્વારા સંચાલિત અંગ્રેજી માધ્યમની પ્રાથમિક શાળાઓમાં નવા પ્રવેશમાં સતત વધારો જોવા મળી રહ્યો છે, કારણ કે શિક્ષણનું માધ્યમ અંગ્રેજી હોવાથી વાલીઓની સંખ્યા વધી રહી છે, જે વિશ્વમાં સૌથી વધુ બોલાતી ભાષા છે.
માતાપિતામાં અંગ્રેજીની ઘેલછા વધી
મનપાના આંકડાં દર્શાવે છે કે 2024માં તેની પ્રાથમિક શાળાઓના અંગ્રેજી માધ્યમના વિભાગોમાં 3,953 નવા વિદ્યાર્થીએ પ્રવેશ મેળવ્યો હતો, જે 2023માં પ્રવેશ લેનારા 1,967 વિદ્યાર્થીઓ કરતા બમણા છે. આમાંથી, 1629 વિદ્યાર્થી પ્રિ-પ્રાયમરી સ્કૂલમાં નોંધાયેલા હતા, જ્યારે 2246 વિદ્યાર્થી પહેલા ધોરણમાં નોંધાયેલા હતા, જે માતાપિતામાં તેમના બાળકોનું અંગ્રેજી શિક્ષણ વહેલું શરૂ કરવાની વધતી જતી ઇચ્છાને પ્રતિબિંબિત કરે છે.
400થી વધુ વિદ્યાર્થીઓ પ્રવેશની ઇંતજારી
મ્યુનિસિપલ સ્કૂલ બોર્ડના એક અધિકારીના જણાવ્યા મુજબ માંગ એટલી ઝડપથી વધી છે કે 55 અંગ્રેજી માધ્યમના વિભાગોમાંથી આઠ હવે સંપૂર્ણ ક્ષમતાથી ચાલી રહ્યા છે, અને 400થી વધુ વિદ્યાર્થીઓ પ્રવેશની રાહ જોઈ રહ્યા છે વાલીઓ વધુને વધુ એ હકીકતથી વાકેફ થઈ રહ્યા છે કે અંગ્રેજી ઉચ્ચ શિક્ષણ અને નોકરીઓના દરવાજા ખોલે છે.
શહેરમાં પંચાવન અંગ્રેજી માધ્યમની શાળા છે
અત્રે ઉલ્લેખનીય છે કે, અમદાવાદ મનપાએ વર્ષ 2010માં શાહપુરમાં એક શાળાથી શરૂઆત કરી હતી. જે હાલ શહેરમાં ૫૫ અંગ્રેજી માધ્યમની શાળાઓ ચલાવે છે, વિદ્યાર્થીઓની વધતી સંખ્યા સાથે તાલમેલ રાખવા માટે દર બે વર્ષે બે ધોરણો (ગ્રેડ) ઉમેરવામાં આવી રહ્યા છે.
