અમદાવાદઃ શહેરના સરદાર વલ્લભભાઈ પટેલ ઈન્ટરનેશનલ એરપોર્ટ પર ડીઆરઆઈ અને કસ્ટમ્સ વિભાગે સંયુક્ત કાર્યવાહી કરી એક મુસાફર પાસેથી અંદાજે રૂ.8 કરોડની કિંમતનો હાઈબ્રિડ ગાંજો (કેનાબીસ) ઝડપી પાડ્યો હતો. આ મુસાફર થાઈલેન્ડના બેંગકોકથી ફ્લાઈટ મારફતે અમદાવાદ એરપોર્ટ પર ઉતર્યો હતો. તેની શંકાસ્પદ હિલચાલને આધારે અધિકારીઓએ તેને અટકાવીને સઘન તપાસ હાથ ધરી છે.
અંદાજિત બજાર કિંમત રૂ. 8 કરોડ
મળતી વિગત મુજબ, બેંગકોકથી અમદાવાદ આવેલા એક યાત્રી પર શંકા જતા અધિકારીઓએ તેની સઘન તપાસ હાથ ધરી હતી. બેગેજ ચેકિંગ દરમિયાન યાત્રીના સામાનમાંથી 6 વેક્યુમ કરેલા પેકેટ્સ મળી આવ્યા હતા. તપાસમાં આ પદાર્થ હાઇ ગ્રેડ હાઇબ્રિડ કેનાબીસ (ગાંજો) હોવાનું બહાર આવ્યું હતું. જપ્ત કરાયેલ ગાંજાનું કુલ વજન 7.71 કિલોગ્રામ છે અને તેની અંદાજિત બજાર કિંમત રૂ. 8 કરોડ હોવાનું જાણવા મળ્યું હતું.
વધુ તપાસ શરૂ કરવામાં આવી
DRI દ્વારા ગાંજો જપ્ત કરીને આરોપીની ધરપકડ કરવામાં આવી છે અને આ ડ્રગ્સ ક્યાંથી લાવવામાં આવ્યો હતો તેમજ કોને સપ્લાય થવાનો હતો તે દિશામાં વધુ તપાસ શરૂ કરવામાં આવી છે. આ કાર્યવાહીથી આંતરરાષ્ટ્રીય ડ્રગ્સ નેટવર્ક સામે મોટી સફળતા મળી હોવાનું માનવામાં આવી રહ્યું છે.
