પોલીસના પટ્ટા ઉતારવાના વિવાદ વચ્ચે નર્મદામાં AAPના જિલ્લા પ્રમુખનો ભાઈ દારૂ વેચતા ઝડપાયાનો દાવો
અમદાવાદ: હાલ ગુજરાતમાં વિપક્ષના નેતાનું પોલીસના પટ્ટા ઉતારવાનું નિવેદન ખૂબ ચર્ચામાં છે. કૉંગ્રેસ પક્ષના વિધાનસભ્ય જિજ્ઞેશ મેવાણીએ પોલીસના પટ્ટા કાઢી લેવાની વાત કરી હતી, તેમના આ નિવેદન પર ગુજરાતમાં ક્યાંક વિરોધ તો ક્યાંક સમર્થન જોવા મળ્યું હતું. જીગ્નેશ મેવાણીના સમર્થનમાં આમ આદમી પાર્ટીના નેતાઓએ પણ ઝંપલાવ્યું હતું. ત્યારે મીડિયા અહેવાલમાં આપના નેતાના ભાઈની પોલીસે દારૂના કેસમાં ધરપકડ કરી હોવાનો દાવો કરવામાં આવી રહ્યો છે.
કૉંગ્રેસ પક્ષના વિધાનસભ્ય જિજ્ઞેશ મેવાણીએ પોલીસના પટ્ટા કાઢી લેવાની વાત કરી હતી અને તેમના આ નિવેદનનો ગુજરાતમાં ખૂબ જ વિરોધ થયો હતો. સત્તાપક્ષના નેતાઓએ કોંગ્રેસ પર ખૂબ માછલાં ધોયા હતા પરંતુ ત્યારબાદ આમ આદમી પાર્ટીએ જીગ્નેશ મેવાણીના સમર્થનમાં નિવેદન આપ્યું હતું. આપના નેતાઓએ જીગ્નેશ મેવાણીના નિવેદનને સત્ય ગણાવ્યૂ હતું અને ગૃહ રાજ્ય મંત્રી હર્ષ સંઘવીએ પોલીસ સાથે કરેલ દુર્વ્યવહારની વાત કરી હતી.
જો કે આ દરમિયાન મીડિયા અહેવાલમાં દાવો કરવામાં આવ્યો હતો કે, નર્મદા જિલ્લા પોલીસે દારૂબંધીના કેસમાં આમ આદમી પાર્ટીના જિલ્લા પ્રમુખના ભાઈને પકડ્યો છે અને આરોપી વીરભદ્રસિંહ ઉર્ફે ભદ્રેશ પાસેથી વેચાણ માટેની દારૂની 11 બોટલો મળી આવી છે. તેનો ભાઈ AAPના જિલ્લા પ્રમુખ હોવાનો દાવો કરવામાં આવ્યો છે.
