અમદાવાદઃ શહેર વિકાસની હરણફાળ ભરી રહ્યું છે. વર્લ્ડ લેવલની ઊંચી ઈમારતો પણ અમદાવાદમાં આકાર લઈ રહી છે. સ્ટેન્ડિંગ કમિટીની બેઠકમાં શહેરમાં બની રહેલી 70 મીટર કે તેથી વધુ ઊંચાઈની ઊંચી ઇમારતોની બાંધકામ યોજનાઓને મંજૂરી આપવા અંગે ચર્ચા કરવામાં આવી હતી.
AMCએ છેલ્લા બે વર્ષમાં શહેરમાં કુલ 17 ઊંચી ઇમારતોને બાંધકામની પરવાનગી આપી છે. તેનાથી AMCને ₹250 કરોડની આવક થઈ હતી. આ તમામ 17 ઊંચી ઇમારતોને છેલ્લા બે વર્ષમાં ફક્ત શહેરના પશ્ચિમ વિસ્તારમાં જ વિકાસ પરવાનગી મળી છે. આ 17 ઊંચી ઇમારતોમાં કુલ 2,000 રહેણાંક એકમો અને 2,300 કોમર્શિયલ એકમોનો સમાવેશ થશે.
સોલમાં 100 મીટરથી ઊંચી ઈમારત
AMCના ટાઉન ડેવલપમેન્ટ વિભાગે 2025માં સોલા સાયન્સ સિટી રોડ પર આવેલી 100 મીટરથી વધુ ઊંચાઈની એક ઊંચી ઇમારત માટે બિલ્ડિંગ યુઝ (BU) પરવાનગી પ્રમાણપત્ર પહેલેથી જ આપી દીધી હતી. આ શહેરની 100 મીટરથી વધુ ઊંચાઈ ધરાવતી સૌપ્રથમ રહેણાંક ઇમારતનો ઉપયોગ શરૂ થશે.
અમદાવાદના ડેવલપર્સ અને બિલ્ડરો SG હાઇવે, સોલા સાયન્સ સિટી રોડ અને આસપાસના વિસ્તારો સહિત પશ્ચિમ વિસ્તારોમાં ગગનચુંબી ઇમારતોબનાવવામાં રસ દાખવી રહ્યા છે. અમદાવાદ શહેરના બોડકદેવ વિસ્તારમાં સૌથી વધુ, એટલે કે સાત ગગનચુંબી ઇમારતોની બાંધકામ યોજનાઓને મંજૂરી આપવામાં આવી છે.
સિંધુ ભવન રોડ પર શહેરની સૌથી ઊંચી ઈમારત
અહીં એ ઉલ્લેખ કરવો જરૂરી છે કે અમદાવાદ શહેરના સિંધુ ભવન રોડ પર બોડકદેવ વોર્ડમાં 147.95 મીટરની ઊંચાઈ ધરાવતી એક કોમર્શિયલ બિલ્ડિંગને મંજૂરી આપવામાં આવી હતી, જે અત્યાર સુધીની સૌથી ઊંચી ઇમારત છે. આ 147 મીટર ઊંચી ઇમારતને ગ્રાઉન્ડ પ્લસ 34 માળ માટે મંજૂર કરવામાં આવી હતી.
વધુમાં 150 મીટરની ઊંચાઈ ધરાવતી કોમર્શિયલ ઇમારતોની બાંધકામ યોજનાઓ મંજૂરી માટે રાજ્ય સરકારની વિશેષ તકનીકી સમિતિને સુપરત કરવામાં આવી છે. આ ઇમારતોમાં 45થી વધુ માળ હશે.
100 મીટરથી ઊંચી 38 ઈમારતને મંજૂરી
AMCએ અત્યાર સુધીમાં 100 મીટરથી વધુ ઊંચાઈની 30 ઇમારતોની બાંધકામ યોજનાઓને મંજૂરી આપી છે, જેમાંથી 23 રહેણાંક અને 7 સંપૂર્ણપણે કોમર્શિયલ છે. આ ઉપરાંત, વધુ પાંચ ઇમારતો હાલમાં મંજૂરી પ્રક્રિયા હેઠળ છે.
આ સિવાય, અમદાવાદ અર્બન ડેવલપમેન્ટ ઓથોરિટી (AUDA) વિસ્તારમાં 100 મીટરથી વધુ ઊંચાઈની 8 ઇમારતોને મંજૂરી આપવામાં આવી છે. આમ, એકલા અમદાવાદ શહેર અને આસપાસના AUDA વિસ્તારમાં કુલ 100 મીટરથી વધુ ઊંચાઈની 38 ઇમારતોને મંજૂરી મળી ચૂકી છે.
