Loksabha Election 2024 : ” મોટું મન રાખો, રાષ્ટ્ર હિતમાં મત આપો ” મતદાન પૂર્વે ક્ષત્રિયોને મનાવવા ગુજરાત ભાજપે અપનાવી આ રણનીતિ
ગાંધીનગર : ગુજરાતની(Gujarat) તમામ 26માંથી 25 બેઠકો પર 7 મેના રોજ મતદાન(Voting) છે. મતદાન પૂર્વે ભાજપે ક્ષત્રિય(Kshatriy) સમુદાયને મનાવવા નવી રણનીતિ અપનાવી છે. ભાજપના તમામ ક્ષત્રિય આગેવાનોએ નિવેદનો આપી સમાજને ભાજપને(BJP) મત આપવા અપીલ કરી હતી. કેન્દ્રીય મંત્રી પુરૂષોત્તમ રૂપાલાના(Purushottam Rupala) વિવાદાસ્પદ નિવેદનથી નારાજ ક્ષત્રિય મતદારોને મનાવવા માટે ભાજપે આખરી રણનીતિ અપનાવી છે. ભાજપના તમામ ક્ષત્રિય આગેવાનોએ ક્ષત્રિય સમાજને રવિવારે લોકસભા ચૂંટણી પ્રચારના અંત પૂર્વે રાષ્ટ્ર હિતમાં ભાજપને મત આપવા અપીલ કરી છે.
ભાજપને મત આપીને મોટું દિલ બતાવવાની અપીલ
એક અખબારના અહેવાલ મુજબ ગુજરાતમાં ભાજપના વરિષ્ઠ ક્ષત્રિય નેતાઓ ભૂપેન્દ્રસિંહ ચુડાસમા, આઈ.કે.જાડેજા, પ્રદીપસિંહ જાડેજા, માંધાતાસિંહ જાડેજા, કેસરી દેવસિંહ ઝાલા, બળવંતસિંહ રાજપૂત, જયદ્રથસિંહ પરમાર, મહેન્દ્રસિંહ સરવૈયા, કિરીટસિંહ રાણા, ધર્મેન્દ્રસિંહ રાણા. સી.કે. રાઉલજી, અરુણસિંહ રાણા, વિરેન્દ્રસિંહ જાડેજા અને પ્રદ્યુમનસિંહ જાડેજાએ એક નિવેદન જાહેર કરીને તેમના સમુદાયને ભાજપને મત આપીને મોટું મન રાખવાની અપીલ કરી હતી.
ક્ષત્રિય આગેવાનોએ આ અપીલ કરી હતી
આ નેતાઓએ તેમના નિવેદનમાં જણાવ્યું હતું કે, “પુરષોત્તમ રૂપાલાએ તેમના નિવેદન પર દુઃખ વ્યક્ત કર્યું છે અને ક્ષત્રિય સમાજની ઘણી વખત માફી માંગી છે.” રૂપાલાએ વારંવાર માફી માગી ત્યારે ક્ષત્રિય સમાજે ‘ક્ષમા વીરસ્ય ભૂષણમ’ (ક્ષમા એ બહાદુરનો ગુણ છે)ના નારા લગાવીને ત્યાગ અને બલિદાનની ભવ્ય પરંપરા દર્શાવીને રાષ્ટ્રહિતમાં ઉદારતા દાખવવી જોઈએ.
દેશ અને રાજ્યના વિકાસમાં ક્ષત્રિય સમાજનો મોટો ફાળો
ભાજપ ગુજરાતના ક્ષત્રિય આગેવાનોએ જણાવ્યું હતું કે, આગામી દિવસોમાં ભારત વિશ્વની ત્રીજી સૌથી મોટી શક્તિ બનવા જઈ રહ્યું છે. આ સંદર્ભમાં દેશ અને સનાતન ધર્મની રક્ષા કરવી એ આપણી ફરજ છે. જ્યારે વડા પ્રધાન નરેન્દ્ર મોદી ભારતને ગૌરવ અપાવી રહ્યા છે, ત્યારે તેમની સાથે સહકાર આપવો અને આ લોકશાહી પ્રક્રિયાનો ભાગ બનવું એ આપણું રાષ્ટ્રીય કર્તવ્ય છે. ભાજપના નેતાઓએ કહ્યું કે, તેઓ પણ રૂપાલાના નિવેદનથી દુખી અને આઘાતમાં છે. જોકે, તેમણે કહ્યું કે, દેશ અને રાજ્યના વિકાસમાં ક્ષત્રિય સમાજનો મોટો ફાળો છે.
