ભુજઃ ૨૬થી ૩૦ જાન્યુઆરી દરમ્યાન દુબઈના દુબઈ વર્લ્ડ ટ્રેડ સેન્ટર અને એક્ઝિબિશન સેન્ટરમાં આયોજિત વિશ્વના સૌથી મોટા ‘ગલ્ફ ફૂડ એક્સ્પો’ ખાતે કચ્છની સરહદ ડેરીમાં ઉત્પાદન કરવામાં આવતી, આંતરરાષ્ટ્રીય ધોરણોને અનુરૂપ કેમલ મિલ્ક સહિતની દૂધની વિવિધ બનાવટોને હવે ખાડીના દેશોમાં ઉપલબ્ધ કરાવવાનો મહત્વપૂર્ણ નિર્ણય લેવામાં આવતાં ગુજરાતના પશુપાલન ક્ષેત્રને વૈશ્વિક બજારમાં એક આગવી ઓળખ મળશે અને પશુપાલકો માટે નવા અવસરના દ્વાર ખુલશે.
દુબઈમાં આયોજિત ગલ્ફ ફૂડ એક્સ્પોમાં ૧૯૫ દેશમાંથી આવેલા ૮૫૦૦થી વધુ પ્રદર્શકો ભાગ લઈ રહ્યા છે. કચ્છની સરહદ ડેરીના ચેરમેન વલમજી હુંબલ તથા ડેરીના પ્લાન્ટ મેનેજર વિશ્વજીત બેનર્જીએ આ એક્સપોની મુલાકાત લીધી હતી. અહીં ‘નોવેલ આઈક્રીમ’ના પ્લાન્ટ ચેરમેન ઈસ્માઈલ મરઝુકી, કો-ફાઉન્ડર સાનિજ પી.કેએ વલમજી હુંબલનું ઉમળકાભેર સ્વાગત કર્યું હતું અને આઈસ્ક્રીમ પ્લાન્ટની મુલાકાત દરમિયાન ગુણવત્તા નિયંત્રણ અને આધુનિક ટેકનોલોજી અંગે માહિતી આપી હતી.
દુબઈ સ્થિત ન્યુટ્રીડોર ડેરી મેન્યુફેક્ચારિંગ એલ.આઇ.સી ની પણ આ કચ્છીઓએ મુલાકાત લીધી હતી જેમાં હેડ ઓફ ક્વોલિટી, રિસર્ચ એન્ડ ડેવલોપમેન્ટ વિભાગના સંજય ભટાચાર્યએ પ્લાન્ટની એ.આઈ આધારિત પ્રક્રિયા અંગે માર્ગદર્શન આપ્યું હતું તેમજ ઉત્પાદન પ્રક્રિયામાં અપનાવવામાં આવતી અધતન ટેકનોલોજી તેમજ આધુનિક પેકેજીંગ સિસ્ટમ અંગે માહિતી આપી હતી.
આ અંગે સરહદ ડેરીના ચેરમેર વલ્લભજી હુંબલે જણાવ્યું હતું કે, ગલ્ફ ફૂડ એક્સ્પો એ ડેરી ક્ષેત્ર માટે વૈશ્વિક પ્લેટફોર્મ પ્રદાન કરે છે, નવું બજાર તથા નિકાસની તકો તેમજ નેટવર્કિંગ અને નવા ભાગીદારો તેમજ ઉદ્યોગ વિકાસ જેવા અનેક લાભો ડેરી ઉદ્યોગને મળે છે. આવનારા સમયમાં દૂધ તથા દૂધની બનાવટો અને વૈશ્વિક સ્તરે લઈ જઈ શકાય તેમ છે. જુદા જુદા દેશના પ્રતિનિધિઓ સાથે તેમજ તેમના સ્ટોલની મુલાકાત લઈને વિશ્વસ્તરે ફૂડ ડેરી અને કૃષિની ઉપલબ્ધીઓ અંગે વિસ્તૃત ચર્ચાઓ કરી હતી.
અહીં વર્લ્ડ ટ્રેડ સેન્ટર ખાતે આયોજિત બેઠકમાં સરહદ ડેરીનું ગુણવત્તા યુક્ત દૂધ હવે ખાડીના દેશોમાં પણ ઉપલબ્ધ કરાવવામાં આવશે તેવો નિર્ણય લેવામાં આવતાં આંતરરાષ્ટ્રીય ભાગીદારી દ્વારા કચ્છ-ગુજરાતના પશુપાલકો માટે નૂતન પણ પડકારજનક અવસરોના દ્વાર ખુલશે તેમ ઉમેર્યું હતું. આ બેઠકમાં ચેરમેન સાથે મેનેજર ઉપરાંત એફપીઓ પ્રોજેક્ટના સંચાલક અનિલ મહેતા તેમજ દુબઈ સ્થિત જી આર કે સી-જી આર ઓ પી કંપનીના ભારતીય ડિરેક્ટર અરુણ પિલ્લે ખાસ ઉપસ્થિત રહ્યા હતા.
